മുസ്ലിം സമുദായവുമായി ബന്ധപ്പെട്ട വിഷയങ്ങളിൽ നിന്ന് നേതൃത്വത്തിന്റെ ശ്രദ്ധ തിരിക്കാനുള്ള ശ്രമമാണ് ജമാഅത്തെ ഇസ്ലാമി നടത്തുന്നതെന്ന് വിമർശനം. എല്ലാ വിഷയങ്ങളെയും ഇസ്ലാമോഫോബിയയായി വ്യാഖ്യാനിച്ച് അതിവൈകാരികത സൃഷ്ടിക്കാനാണ് ശ്രമമെന്നും SKSSF ആരോപിക്കുന്നു.
ജമാഅത്തെ ഇസ്ലാമിക്കെതിരെ രൂക്ഷ വിമർശനവുമായി സമസ്ത വിദ്യാർത്ഥി സംഘടനയായ SKSSF. SKSSF സംസ്ഥാന കൗൺസിലിലാണ് ജമാഅത്തെ ഇസ്ലാമിക്കെതിരെ പ്രമേയം അവതരിപ്പിച്ചത്. മുസ്ലിം സമുദായവുമായി ബന്ധപ്പെട്ട അടിസ്ഥാന വിഷയങ്ങളിൽ നിന്ന് നേതൃത്വത്തിന്റെ ശ്രദ്ധ തിരിക്കാനുള്ള ശ്രമങ്ങൾക്കെതിരെ ജാഗ്രത വേണമെന്നാണ് പ്രമേയത്തിലെ പ്രധാന ആവശ്യം. എല്ലാ വിഷയങ്ങളെയും ഇസ്ലാമോഫോബിയയായി വ്യാഖ്യാനിക്കുന്ന രീതി ശരിയല്ലെന്നും SKSSF വിമർശിക്കുന്നു. അതിവൈകാരികത സൃഷ്ടിക്കുന്ന ശൈലിയാണ് ജമാഅത്തെ ഇസ്ലാമിയുടേത്. ഇത്തരം വിഷയങ്ങളിലൂടെ പൊതുസ്വീകാര്യത നേടിയെടുക്കാനാണ് ശ്രമം. ജമാഅത്തെ ഇസ്ലാമിക്ക് ഭരണരംഗത്ത് സ്വീകാര്യത ഉണ്ടാക്കിക്കൊടുക്കരുതെന്നും അത്തരമൊരു സാഹചര്യമുണ്ടായാൽ വലിയ വില നൽകേണ്ടിവരുമെന്നും SKSSF മുന്നറിയിപ്പ് നൽകുന്നു.
വഖഫ് ബോർഡിൽ വെൽഫെയർ പാർട്ടിക്ക് അംഗത്വം ലഭിച്ച പശ്ചാത്തലത്തിൽ കൂടിയാണ് SKSSF-ന്റെ വിമർശനം. ജമാഅത്തെ ഇസ്ലാമിയുടെ രാഷ്ട്രീയ ഇടപെടലുകളെയും പൊതുസ്വീകാര്യത നേടാനുള്ള നീക്കങ്ങളെയും ലക്ഷ്യമിട്ടാണ് SKSSF-ന്റെ പ്രമേയം.
