ചൂരൽമല പ്രദേശത്തിപ്പോൾ പലതരത്തിലുള്ള നിർമാണങ്ങളും നടക്കുന്നുണ്ട്. അതൊക്കെ നല്ലകാര്യവുമാണ്. എന്നാൽ പഴയ സ്കൂൾ റോഡിന് പകരം പടവെട്ടിക്കുന്നിലേക്കു നിർമ്മിക്കുന്ന പാത സ്വകാര്യവ്യക്തികളുടെ സ്ഥലത്തുകൂടിയാണ് എന്നത് പ്രതിഷേധത്തിനിടയാക്കുകയാണ്. വിജി, ഇസഹാക്ക് എന്നിവരുടെ ഉരുളെടുത്ത സ്ഥലത്തുകൂടി പാത നിർമ്മിക്കുമ്പോൾ അനുവാദം പോലും ചോദിച്ചില്ലെന്നാണ് പരാതി. ഇതേ തുടർന്ന് വഴിയടച്ചായിരുന്നു ഇവരുടെ പ്രതിഷേധം.
വെള്ളാർമല സ്കൂൾറോഡ് ഉണ്ടായിരുന്നിടത്തുകൂടി ഇപ്പോൾ പുന്നപ്പുഴയൊഴുകുകയാണ്. ഇതിനടുത്തുള്ള സ്ഥലമെല്ലാം ഉരുളെടുത്തു. അത്തരത്തിലുള്ള സ്ഥലമാണ് വിജി, ഇസഹാക്ക് എന്നിവരുടേത്. ഇവിടെ വീടിനായി തറ കെട്ടിയിരുന്നു. അതെല്ലാം പൂർണമായും തകർന്നു. ടൗൺഷിപ്പിൽ ഇവർക്ക് വീട് അനുവദിക്കേണ്ടതായിരുന്നു. തറ നഷ്ടപ്പെട്ടവർക്ക് വരെ വീട് ലഭിച്ചിട്ടും ഇവരെ അവഗണിച്ചുവെന്നാണ് പരാതി. ഇവരുടെ സ്ഥലത്തുകൂടിയാണ് ഇപ്പോൾ പടവെട്ടിക്കുന്നിലേക്കുള്ള പുതിയ റോഡ് കെട്ടുന്നത്. സ്ഥലത്തിൻറെ നഷ്ടപരിഹാരം ലഭിച്ചെന്ന് മാത്രമല്ല, അനുവാദം പോലും ചോദിക്കാതെയാണ് പിഡബ്ല്യുഡി നിർമാണ പ്രവൃത്തികൾ തുടങ്ങിയത്.
നിലവിലിപ്പോൾ റോഡ് ഇവർ അടച്ചുകെട്ടി. ഇക്കാര്യത്തിൽ ഒരു തീരുമാനമുണ്ടാകണമെന്നാണ് ആവശ്യം. കളക്ടറെ കാണാൻ ശ്രമിച്ചെങ്കിലും നടന്നില്ല. പടവെട്ടിക്കുന്നുകാരെ പുനരധിവാസ ലിസ്റ്റിൽ ഉൾപ്പെടുത്തണമെന്ന ആവശ്യം നേരത്തെയുണ്ട്. മുൻ സർക്കാർ ഇക്കാര്യം പരിഗണിച്ചിട്ടില്ല. ഈ സർക്കാർ പരിഗണിക്കുമോ എന്ന കാര്യത്തിൽ ഉറപ്പുമില്ല. അവിടേക്കുള്ള വഴിയിലാണ് ഈ വിഷയം ആളിക്കത്തുന്നത്.
