നാളെ സമരപ്പന്തലിൽ സിജെപിയുടെ നേതൃത്വത്തിൽ നിരാഹാര സമരം ആരംഭിക്കും. കേരള ഘടകത്തിലെ രണ്ട് പ്രവർത്തകരാണ് നിരാഹാരമിരിക്കുന്നത്. അതേസമയം അധ്യാപക-വിദ്യാർത്ഥി അനുപാതം കുറക്കില്ലെന്ന നിലപാട് തുടർന്ന് സർക്കാർ വീണ്ടും രംഗത്ത്.
സമരത്തിന് പിന്തുണയുമായി നേരത്തെ ഡിവൈഎഫ്ഐ, എഐഎസ്എ, യുവമോർച്ച, എബിവിപി, എസ്‌യുസിഐ തുടങ്ങിയ യുവജന സംഘടനകൾ രംഗത്തെത്തിയിരുന്നു. അധ്യാപക സംഘടനയായ കെഎസ്ടിഎയും സമരത്തിന് ഐക്യദാർഢ്യം പ്രഖ്യാപിച്ച് എത്തി. പിന്നാലെയാണ് സിജെപി പ്രവർത്തകരും സമരത്തിന്റെ ഭാഗമാകുന്നത്. സിജെപി സൗത്ത് ഹെൽത്ത് കോർഡിനേറ്റർമാരായ ഫിറോസ് ഖാനും, സനൂപുമാണ് നാളെ മുതൽ സമരപ്പന്തലിൽ നിരാഹാരമിരിക്കുന്നത്. ഉദ്യോഗാർത്ഥികളുടെ പ്രതിഷേധം 122 ആം ദിവസത്തിലേക്ക് കടക്കുമ്പോഴും പ്രധാന ആവശ്യമായ അധ്യാപക വിദ്യാർത്ഥി അനുപാതം കുറയ്ക്കാൻ ആകില്ലെന്ന നിലപാടിൽ തന്നെയാണ് സർക്കാർ.
അതേസമയം, സമരസമിതി സെക്രട്ടറി വളർമതിയുടെ നിരാഹാര സമരം പത്താം ദിവസവും തുടരുകയാണ്. വിവിധ സംഘടനകളുടെ പിന്തുണ കൂടി ലഭിച്ചതോടെ സെക്രട്ടറിയേറ്റിന് മുന്നിലെ സമരം കൂടുതൽ ശ്രദ്ധ നേടുകയാണ്.
