പയ്യന്നൂരിൽ വിവാദ പ്രസംഗവുമായി സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷ്. വി. കുഞ്ഞികൃഷ്ണൻ അനുകൂലിയുടെ ചെമ്മീൻ ഷെഡ് കത്തിച്ച സംഭവത്തിൽ പാർട്ടിക്ക് പങ്കില്ലെന്ന് വിശദീകരിക്കുന്നതിനിടെയാണ് “ഷെഡ് മാത്രമല്ല, അതിനടിയിലുള്ളതും മാന്തിയെടുക്കാൻ പാർട്ടിക്ക് ശേഷിയുണ്ട്” എന്ന പരാമർശം നടത്തിയത്.
പയ്യന്നൂരിലെ അക്രമസംഭവങ്ങളിലെ യഥാർത്ഥ പ്രതികളെ പിടികൂടണമെന്നും ഇടതുവിരുദ്ധ പ്രചാരണം അവസാനിപ്പിക്കണമെന്നും ആവശ്യപ്പെട്ട് എൽഡിഎഫ് മണ്ഡലം കമ്മിറ്റിയുടെ നേതൃത്വത്തിൽ ഡിവൈഎസ്പി ഓഫീസിലേക്ക് നടത്തിയ മാർച്ചിന് പിന്നാലെയായിരുന്നു രാഗേഷിന്റെ പ്രതികരണം.
പയ്യന്നൂരിലെ സ്ഥാനാർഥിയെ മാറ്റാതിരുന്നത് വി. കുഞ്ഞികൃഷ്ണൻ ഉന്നയിച്ച ആരോപണങ്ങൾ ശരിയാണെന്ന് ജനങ്ങൾ തെറ്റിദ്ധരിക്കാതിരിക്കാനാണെന്നും രാഗേഷ് പറഞ്ഞു. തെരഞ്ഞെടുപ്പിൽ തോറ്റുവെന്ന് കരുതി പാർട്ടി തകരുമെന്ന് ആരും കരുതേണ്ടതില്ലെന്നും അദ്ദേഹം കൂട്ടിച്ചേർത്തു.
