എറണാകുളം ആലുവയില്‍ കടയ്ക്ക് മുന്നില്‍ സിഗരറ്റ് വലിച്ചതിനെ ചൊല്ലിയുള്ള തര്‍ക്കം കലാശിച്ചത് തമ്മില്‍തല്ലില്‍. മുഖത്തടക്കം പരുക്കേറ്റ് ചികിത്സയിലായതോടെ ആലുവ സ്വദേശികളെ പ്രതികളാക്കി പൊലീസ് കേസെടുത്തു. പൊലീസ് നടപടിയിലേക്ക് നീങ്ങുന്നതിനിടെ പ്രശ്‌നം ഒത്തുതീര്‍പ്പാക്കാനും നീക്കം നടക്കുന്നുണ്ട്.
പൊതുസ്ഥലത്ത് പുകവലിക്കുന്നത് എന്തുകൊണ്ടും ഹാനികരമെന്ന് തെളിയിക്കുന്നതാണ് പുറത്തുവന്ന ദൃശ്യങ്ങള്‍. ആലുവ പുളിഞ്ചുവട്ടിലെ ചായകടയ്ക്ക് സമീപമാണ് സംഘര്‍ഷം നടന്നത്. കഴിഞ്ഞ ദിവസം രാത്രി ചായ കുടിക്കാനെത്തിയ ചിലര്‍ ചായക്കടയ്ക്ക് സമീപത്തെ തുണിക്കടയ്ക്ക് മുന്നിലെ തിണ്ണയിലിരുന്ന് സിഗരറ്റ് വലിച്ചു. ഇത് കടയിലെ ചിലര്‍ ചോദ്യം ചെയ്തതോടെയാണ് സംഘര്‍ഷങ്ങളുടെ തുടക്കം. സിഗരറ്റ് വലിച്ചവര്‍ ചോദ്യം ചെയ്തവരെ ആക്രമിച്ചു. ഇതോടെ കാര്യങ്ങള്‍ കൈവിട്ടുപോയി. കടയുടമകള്‍ സ്ഥലത്ത് നിന്ന് പോയെങ്കിലും പിന്നീട് കൂടുതല്‍ ആളുകളുമായി മടങ്ങിയെത്തി. പിന്നെ കൂട്ടത്തല്ലാണ് നടന്നത്.
സംഭവവുമായി ബന്ധപ്പെട്ട് ആലുവ സ്വദേശികളായ മിലന്‍, റോജന്‍, അമാന്‍, തന്‍വീര്‍ എന്നിവരെ പ്രതികളാക്കി ആലുവ പൊലീസ് കേസെടുത്തു. കൂട്ടത്തല്ലിന്റെ സിസിടിവി ദൃശ്യങ്ങളും പുറത്തുവന്നതോടെ പൊലീസ് വിശദമായ അന്വേഷണം ആരംഭിച്ചിട്ടുണ്ട്. ഇതോടെ കേസ് ഒത്തുതീര്‍പ്പാക്കാനുള്ള ശ്രമത്തിലാണ് ഇരുപക്ഷവും.
