ഫാസ്റ്റ് ടാഗിൽ പണമില്ലാത്തതിനെ തുടർന്ന് കെഎസ്ആർടിസി ബസ്സുകൾ ടോൾ ബൂത്തുകളിൽ കുടുങ്ങി. പാലക്കാട് പന്നിയങ്കര, തൃശ്ശൂർ പാലിയേക്കര എന്നിവിടങ്ങളിലാണ് ഫാസ്റ്റ് ടാഗിൽ പണമില്ലാത്തതിനെ തുടർന്ന് ടോൾ ബൂത്ത് ജീവനക്കാർ ബസ് തടഞ്ഞിട്ടത്. പിന്നീട് ഗൂഗിൾ പേ വഴി പണം അടച്ചാണ് പലയിടങ്ങളിലും യാത്ര തുടർന്നത്. റെയിൽവേ സ്റ്റേഷനിലേക്കും വിമാനത്താവളത്തിലേക്കും പോകേണ്ട യാത്രക്കാർ അടക്കം വലഞ്ഞു.പൊള്ളാച്ചിയിൽ നിന്ന് തൃശ്ശൂരിലേക്ക് വന്നതാണ് അന്തർ സംസ്ഥാന കെഎസ്ആർടിസി ബസ്. പന്നിയങ്കരയിൽ എത്തിയപ്പോഴാണ് പണമില്ലാത്തതിനെ തുടർന്ന് ടോൾ ബൂത്തിൽ ബസ് തടഞ്ഞത്. ദീർഘദൂര ട്രെയിനിൽ യാത്ര തുടരേണ്ടിയിരുന്ന യാത്രക്കാർ ബഹളമുണ്ടാക്കി. കണ്ടക്ടർ കൺട്രോൾ റൂമിൽ ബന്ധപ്പെട്ടെങ്കിലും ഫലമുണ്ടായില്ല. തൃശ്ശൂർ ഡിപ്പോയിൽ വിവരം ധരിപ്പിച്ചിട്ടും കാര്യമില്ലെന്നായതോടെ പുറകെ വന്ന ബസ്സുകളിൽ യാത്രക്കാരെ നിർബന്ധിച്ചു കയറ്റിവിട്ടു. പിന്നീട് ഗൂഗിൾ പേ വഴി പണം അടച്ചാണ് ബസ് ടോൾ ബൂത്ത് കടന്നത്. ഒന്നും രണ്ടുമല്ല അഞ്ചിലധികം ബസ്സുകളാണ് പന്നിയങ്കരയിൽ മാത്രം കുടുങ്ങിയത്. പാലിയേക്കരയിലും സമാന സാഹചര്യം ഉണ്ടായി. ഇതോടെ ഫാസ്റ്റ് ടാഗിൽ പണമില്ലാത്ത ബസ്സുകൾ പാലിയേക്കര എത്തുന്നതിനുമുൻപ് ദേശീയപാതയിൽ നിന്ന് ഇടത്തോട്ട് തിരിഞ്ഞ് തൃക്കൂർ വഴി യാത്ര ചെയ്തു. പ്രിയദർശിനി ബസ് അടക്കം കിലോമീറ്റർ അധികം യാത്ര ചെയ്താണ് ടോൾ ബൂത്തിൽ പണമടക്കാതെ രക്ഷപ്പെട്ടത്. ഡിപ്പോയുടെ വീഴ്ചയാണ് പണമില്ലാത്തതിന് കാരണമെന്നാണ് കെഎസ്ആർടിസിയുടെ ഔദ്യോഗിക വിശദീകരണം. തൃശ്ശൂരിൽ നിന്ന് ഓപ്പറേറ്റ് ചെയ്യുന്ന ബസ്സുകളാണ് കുടുങ്ങിയതെന്നും കെഎസ്ആർടിസി വിശദീകരിക്കുന്നു.
ടോൾ ബൂത്തുകളിൽ കുടുങ്ങി കെഎസ്ആർടിസി ബസ്സുകൾ
1 min read
