പദ്ധതിയുടെ മറവിൽ ജിസിഡിഎയിൽ ദുരൂഹ സാമ്പത്തികയിടപാടുകളും ഗുരുതര കരാർ ലംഘനങ്ങളും നടന്നുവെന്നാണ് കണ്ടെത്തൽ. കെട്ടിടത്തിന്റെ ചോർച്ചയ്ക്ക് കാരണം ഡിസൈനിലെയും നിർമാണത്തിലെയും അപാകതയാണൈന്ന് കണ്ടെത്തിയിട്ടും കരാർ കമ്പനിയെ ബ്ലാക്ക് ലിസ്റ്റിൽപെടുത്താത്തത് ദുരൂഹമെന്നും റിപ്പോർട്ടിലുണ്ട്.
76 കുടുംബങ്ങളെ വഞ്ചിച്ച ഗൂഡാലോചനയിലേക്ക് വെളിച്ചം വീശുന്നതാണ് ഓഡിറ്റ് റിപ്പോർട്ട്. നിർമാണത്തിലെ പാളിച്ചകൾ, സാമ്പത്തിക ക്രമക്കേടുകൾ, കരാർ ലംഘനങ്ങൾ, ഉദ്യോഗസ്ഥരുടെ കെടുകാര്യസ്ഥത എന്നിവ റിപ്പോർട്ടിൽ അക്കമിട്ട് നിരത്തുന്നു. തൃശൂർ ജില്ല ലേബർ കോൺട്രാക്ട് സഹകരണ സംഘത്തെയാണ് നിർമാണം ഏൽപ്പിച്ചത്. അക്രഡിറ്റഡ് ഏജൻസി പോലുമല്ലാത്ത കമ്പനിക്ക് കരാർ നൽകിയത് ടെണ്ടർ പോലും വിളിക്കാതെയാണ്. നിർമാണ സാമഗ്രികളുടെ ഗുണനിലവാരം പോലും പരിശോധിക്കാതിരുന്ന ജിസിഡിഎ കരാർ കമ്പനിയുടെ സാമ്പത്തിക ഭദ്രത പരിശോധിച്ചില്ലെന്നും റിപ്പോർട്ടിലുണ്ട്. കോടികളുടെ നിർമാണ ജോലികൾ ഏൽപ്പിച്ചത് ബാങ്ക് ഗ്യാരണ്ടി പോലും വാങ്ങാതെയാണ്. ജോലികൾ തുടങ്ങും മുൻപ് തന്നെ മൊബിലൈസേഷൻ അഡ്വാൻസെന്ന നിലയിൽ രണ്ട് കോടിയിലേറെ രൂപ നൽകി. നിർമാണം അപ്പാടെ പാളിയിട്ടും കരാർ കമ്പനിയെ ബ്ലാക്ക് ലിസ്റ്റ് ചെയ്തില്ല.
ജിസിഡിഎയെ സംശയനിയഴലിൽ നിർത്തുന്ന നിരവധി പാളിച്ചകളാണ് പരിശോധനയിൽ കണ്ടെത്തിയത്. നിർദേശിക്കപ്പെട്ട നിർമാണ രീതിയും ജിസിഡിഎ അട്ടിമറിച്ചു. വിദഗ്ദരായ എഞ്ചിനീയർമാരടക്കം ജിസിഡിഎയിൽ ഉണ്ടായിട്ടും സ്വകാര്യ ഏജൻസികളുടെയും വ്യക്തികളുടെയും ഉപദേശം തേടിയതിലും ഓഡിറ്റ് റിപ്പോർട്ട് സംശയം പ്രകടിപ്പിക്കുന്നു. കരാർ കമ്പനിക്ക് അഡ്വാൻസ് നൽകാൻ രണ്ട് കോടിയിലേറെ സ്ഥിരം നിക്ഷേപം പിൻവലിച്ചതും ജിസിഡിഎക്ക് നഷ്ടമുണ്ടാക്കി. സെക്രട്ടറിയുടെ എതിർപ്പ് മറികടന്നായിരുന്നു ചെയർമാൻ സി.എൻ. മോഹനന്റെ നടപടിയെന്നും റിപ്പോർട്ടിലുണ്ട്. ട്രഷറിയിലും അക്കൗണ്ടിലും കോടികളുള്ളപ്പോഴായിരുന്നു ഈ നഷ്ടക്കച്ചവടം. പദ്ധതിയുടെ മറവിൽ നടന്നത് വൻ അഴിമതിയെന്ന് വ്യക്തമാക്കുന്നത് കൂടിയാണ് ഓഡിറ്റ് റിപ്പോർട്ടിലെ വിവരങ്ങൾ.
