കണ്ണൂർ സി.പി.ഐ.എം വിപുലീകൃത ജില്ലാ കമ്മിറ്റിയിൽ മാസപ്പടി പരാമർശത്തിൽ ക്ഷുഭിതനായി പ്രതിപക്ഷ നേതാവ് പിണറായി വിജയൻ. വീണാ ടിയെ ന്യായീകരിച്ച പാർട്ടി നിലപാടിനെതിരെ പാനൂരിലെ പ്രതിനിധി രൂക്ഷ വിമർശനം നടത്തി. വി.എസിന്റെയും കോടിയേരിയുടെയും മക്കൾ കേസിൽപ്പെട്ടപ്പോൾ പാർട്ടി തള്ളിപ്പറഞ്ഞു. വീണയുടെ കാര്യത്തിലും അതേ നിലപാട് വേണമെന്നുമായിരുന്നു ആവശ്യം. മറുപടി പ്രസംഗത്തിൽ ക്ഷുഭിതനായ പിണറായി വിജയൻ വിമർശനത്തിന് പിന്നിൽ ആസൂത്രിത നീക്കമെന്ന് ആരോപിച്ചു.
വീണാ ടി ക്കെതിരായ മാസപ്പടി കേസിൽ പാർട്ടി സ്വീകരിച്ച നിലപാടാണ് കണ്ണൂർ വിപുലീകൃത ജില്ലാ കമ്മിറ്റിയിൽ ചോദ്യം ചെയ്യപ്പെട്ടത്. വ്യക്തിപരമായ കേസിനെ പാർട്ടിക്കെതിരായ ആക്രമണമായി ചിത്രീകരിച്ച് വീണയെ ന്യായീകരിച്ചത് തെറ്റായി എന്നായിരുന്നു പാനൂരിൽ നിന്നുള്ള പ്രതിനിധിയുടെ വിമർശനം. വി.എസ്. അച്യുതാനന്ദന്റെയും കോടിയേരി ബാലകൃഷ്ണന്റെയും മക്കൾ കേസിൽപ്പെട്ടപ്പോൾ പാർട്ടി അവരെ തള്ളിപ്പറഞ്ഞു. വീണയുടെ കാര്യത്തിലും അതേ നിലപാട് സ്വീകരിക്കണമെന്നായിരുന്നു ആവശ്യം. പിണറായി വിജയൻ പാർട്ടിയുടെ പതനത്തിന് കളമൊരുക്കുകയാണെന്ന രൂക്ഷ വിമർശനവും ഉയർന്നു.
രണ്ടര മണിക്കൂർ നീണ്ട മറുപടി പ്രസംഗത്തിൽ വിമർശനമുന്നയിച്ച പ്രതിനിധിയെ പേരെടുത്ത് പരാമർശിച്ചായിരുന്നു പിണറായിയുടെ പ്രതികരണം. മാസപ്പടി കേസിനെക്കുറിച്ച് മാത്രം ഒരു മണിക്കൂറോളം പിണറായി വിശദീകരിച്ചു. ചർച്ച വന്ന വഴി മനസ്സിലായെന്നായിരുന്നു പ്രതികരണം. പാനൂരിൽ പഴയ വിഭാഗീയതയുടെ ബാക്കി ഇപ്പോഴുമുണ്ടെന്നും വിമർശനത്തിന് പിന്നിൽ ചില കേന്ദ്രങ്ങളുടെ ആസൂത്രിത നീക്കമുണ്ടെന്നും പിണറായി ആരോപിച്ചു.
മകൾക്കെതിരായ കേസിൽ പാർട്ടി നിലപാടിനെ ചോദ്യം ചെയ്തത് പിണറായിയുടെ സ്വന്തം തട്ടകത്തിൽ നിന്നുതന്നെയാണ് എന്നാണ് വിമർശനം. അതിനെ വിഭാഗീയ നീക്കമായി പിണറായി വ്യാഖ്യാനിക്കുമ്പോൾ, കണ്ണൂർ സി.പി.ഐ.എമ്മിൽ പഴയ വിഭാഗീയത വീണ്ടും ശക്തമാകുന്നു എന്ന സൂചന കൂടിയാണ് ലഭിക്കുന്നത്.
