സാംസ്കാരികനഗരി പൂരാവേശത്തിൽ. വെടിക്കെട്ട് ഒഴിവാക്കി നിയന്ത്രണങ്ങളോടെ പൂരം പുരോഗമിക്കുന്നു

36 മണിക്കൂർ നീളുന്ന തൃശ്ശൂർ പൂരം ചടങ്ങുകൾ പുരോഗമിക്കുകയാണ്. മുണ്ടത്തിക്കോട് ദുരന്തത്തിന്റെ പശ്ചാത്തലത്തിൽ  ആർഭാടങ്ങൾ ഒഴിവാക്കിയാണ് ഇത്തവണത്തെ പൂരം.വെടിക്കെട്ട് ഒഴിവാക്കിയും കുടമാറ്റത്തിന്റെ സമയം പുനഃക്രമീകരിച്ചുമാണ് ചടങ്ങുകൾ നടത്തുന്നത്.
അതിരാവിലെ കണിമംഗലം ശാസ്താവ് വടക്കുംനാഥ ക്ഷേത്രത്തിലേക്ക് എഴുന്നള്ളി. പിന്നാലെ പൂരാവേശം ഉച്ചസ്ഥായിയിൽ . ഘടകപ്പൂരങ്ങൾ ഓരോന്നായി വടക്കും നാഥ സന്നിധിയിലെത്തി മടങ്ങി. മേട സൂര്യൻ്റെ ചൂടിനെ ആസ്വാദന ലഹരിയിൽ ചെറുത്തുതോൽപ്പിച്ചു പൂര പ്രേമികൾ.
കോങ്ങാട് മധുവിന്റെ നേതൃത്വത്തിൽ മഠത്തിൽ വരവ് പഞ്ചവാദ്യം അരങ്ങേറി. ഉച്ചയ്ക്ക് 2 മണിയോടെയാണ് പൂരപ്രേമികൾ കാത്തിരിയ്ക്കുന്ന ഇലഞ്ഞിത്തറ മേളം വടക്കുംനാഥ ക്ഷേത്രത്തിനകത്ത് നടക്കുക.വൈകീട്ട് 5.30 ന് തിരുവമ്പാടി-പാറമേക്കാവ് വിഭാഗങ്ങളുടെ വിശ്വപ്രസിദ്ധമായ കുടമാറ്റം നടക്കും.ശബ്ദ-വർണ്ണ വിസ്മയങ്ങൾ കുറവായെങ്കിലും, ആചാരങ്ങൾ നിലനിർത്തിയുള്ള പൂരം എന്ന നിലയിൽ ഇത്തവണത്തെ ആഘോഷം ശ്രദ്ധേയമാകുന്നു.നാളെ പകൽപൂരത്തിന് ശേഷം ഇരുഭഗവതിമാരും ഉപചാരം ചൊല്ലി പിരിയുന്നതോടെ ഈ വർഷത്തെ പൂരത്തിന് സമാപനമാകും.