വിഎസ് അച്യുതാനന്ദന്റെ ഒന്നാം ചരമവാർഷികത്തോടനുബന്ധിച്ച് പ്രസിദ്ധീകരിക്കാനിരുന്ന ഓർമ്മക്കുറിപ്പ് ദേശാഭിമാനി വാരാന്ത്യപതിപ്പിൽ നിന്ന് മാറ്റിവെച്ചു. സാങ്കേതിക കാരണങ്ങളാലാണ് വാരാന്ത്യപതിപ്പ് ഇന്ന് പ്രസിദ്ധീകരിക്കാത്തതെന്ന് പത്രം അറിയിച്ചു.ഇന്നത്തെ പതിപ്പിൽ നാടകനടനായ വിജയന്റെ ജീവിതത്തെ ആസ്പദമാക്കിയുള്ള “കള്ളൻ വിജയൻ, ധന്യ നാടക ഗ്രാമം, മുത്തിപ്പാറ പി.ഒ” എന്ന ലേഖനവും, വിഎസ് അച്യുതാനന്ദനെ അനുസ്മരിക്കുന്ന “മുഴങ്ങുന്നുണ്ട് ഇപ്പോഴും ആ കടലിരമ്പം” എന്ന ഓർമ്മക്കുറിപ്പും ഒരുമിച്ച് ഉൾപ്പെടാനായിരുന്നു തീരുമാനം.
‘കള്ളൻ വിജയൻ’ എന്ന തലക്കെട്ടും വിഎസിന്റെ ഓർമ്മക്കുറിപ്പും ഒരേ പതിപ്പിൽ വന്നാൽ അത് തെറ്റായി വ്യാഖ്യാനിക്കപ്പെടാൻ സാധ്യതയുണ്ടെന്ന വിലയിരുത്തലിനെ തുടർന്നാണ് വാരാന്ത്യപതിപ്പ് മാറ്റിവെച്ചതെന്നാണ് ദേശാഭിമാനിയുടെ വിശദീകരണം.നാളെ വിഎസിന്റെ ഓർമ്മക്കുറിപ്പ് പ്രസിദ്ധീകരിക്കുമെന്നും, ഒന്നാം ചരമവാർഷിക ദിനത്തിൽ പ്രത്യേക പതിപ്പ് പുറത്തിറക്കുമെന്നും ദേശാഭിമാനി അറിയിച്ചു.
