അഭിറാമിനെ കൊലപ്പെടുത്തിയശേഷം മൃതദേഹം മറ്റൊരിടത്ത് കൊണ്ടുപോയി ഉപേക്ഷിക്കാൻ പ്രതികൾ തീരുമാനിച്ചിരുന്നു എന്ന് മൊഴി. അതിനായി ചാക്കും വാങ്ങി. നാലാം പ്രതിയും രണ്ടാം പ്രതി ഉമറിന്റെ പെൺസുഹൃത്തുമായ ഐശ്വര്യയാണ് പോലീസിന് മൊഴി നൽകിയത്. അതേ സമയം കേസിലെ നിർണായക തെളിവുകളായ പ്രതികളുടെ മൊബൈൽ ഫോൺ കണ്ടെത്താൻ പോലീസിന് ഇതുവരെ സാധിക്കാത്തത് അന്വേഷണത്തിന് വെല്ലുവിളിയാകുന്നുണ്ട്.
ഉമറിൻ്റെ പെൺ സുഹൃത്ത് ഐശ്വര്യയിൽ നിന്നാണ് കേസന്വേഷണത്തിന് നിർണായകമാകുന്ന മൊഴികൾ പൊലീസിന് ലഭിച്ചത്. അഭിറാമിന്റെ മരണം ഉറപ്പായതോടെ മൃതദേഹം ചാക്കിലാക്കി ഉപേക്ഷിക്കാനായിരുന്നു പ്രതികളുടെ നീക്കം. ഇതിനായി ഒന്നാം പ്രതിയായ പതിനേഴുകാരൻ ശ്രീകാര്യത്തെ ഒരു ആക്രിക്കടയിൽ നിന്ന് ചാക്ക് വാങ്ങിയിരുന്നു. ഈ കടക്കാരൻ പ്രതിയെ തിരിച്ചറിഞ്ഞിട്ടുമുണ്ട്. എന്നാൽ, മൃതദേഹം ചാക്കിലാക്കി മാറ്റാൻ തുടങ്ങുന്നതിനിടെ അപ്രതീക്ഷിതമായി മഴ പെയ്തതോടെ പ്ലാൻ മാറ്റിയ പ്രതികൾ മൃതദേഹം കാട്ടുപൊന്തയിൽ ഉപേക്ഷിച്ച് കടന്നു കളയുകയായിരുന്നു.
അന്വേഷണത്തിൽ തങ്ങളിലേക്ക് പോലീസ് എത്താതിരിക്കാൻ അതീവ ജാഗ്രതയോടെയാണ് രണ്ടാം പ്രതി ഉമർ നീക്കങ്ങൾ നടത്തിയത്. സിസിടിവി ക്യാമറകളുള്ള പ്രധാന വഴികളെല്ലാം ഒഴിവാക്കി ചതുപ്പിലൂടെയാണ് ഉമർ സംഭവസ്ഥലത്ത് എത്തിയത്. പോലീസ് ടവർ ലൊക്കേഷൻ പരിശോധിച്ചാൽ താൻ സംഭവസ്ഥലത്ത് ഇല്ലായിരുന്നു എന്ന് വരുത്തിത്തീർക്കാൻ ഉമർ തന്റെ മൊബൈൽ ഫോൺ വീട്ടിൽ തന്നെ വെച്ചിരുന്നു. വീട്ടിൽ നിന്നിറങ്ങിയ സമയം മുതൽ തിരിച്ചെത്തുന്നതുവരെ തന്റെ ഫോണിലേക്ക് കോൾ കണക്ട് ചെയ്തു വെക്കാൻ ഉമർ പെൺസുഹൃത്തായ ഐശ്വര്യയോട് ആവശ്യപ്പെട്ടിരുന്നു. ഈ ഫോൺ രേഖകൾ പരിശോധിച്ചാൽ കേസിൽ നിന്നും തന്നെ രക്ഷിക്കാനുള്ള വഴി അഭിഭാഷകന് ലഭിക്കുമെന്നായിരുന്നു ഉമറിന്റെ കണക്കുകൂട്ടൽ.
അതേസമയം, കേസിൽ നിർണ്ണായക തെളിവുകൾ കണ്ടെത്താനാകാത്തത് പോലീസിനെ കുഴക്കുന്നുണ്ട്. കൊല്ലപ്പെട്ട അഭിറാമിന്റെ ഫോൺ, പ്രതിയായ പതിനെട്ടുകാരി ആനന്ദയുടെ ഫോൺ, ഒന്നാം പ്രതിയായ പതിനേഴുകാരന്റെ ഫോൺ, ഒപ്പം കൊലപാതക സമയത്ത് പ്രതികൾ ധരിച്ചിരുന്ന വസ്ത്രങ്ങൾ എന്നിവ ഇതുവരെ കണ്ടെത്താൻ പോലീസിന് കഴിഞ്ഞിട്ടില്ല. ഇവയെല്ലാം തോട്ടിൽ ഉപേക്ഷിച്ചു എന്നാണ് പ്രതികൾ പോലീസിനോട് പറഞ്ഞിരിക്കുന്നത്. സ്കൂബ ടീം എത്തി തോട് കേന്ദ്രീകരിച്ച് മുങ്ങിത്തപ്പൽ നടത്തിയെങ്കിലും ഈ നിർണ്ണായക തെളിവുകൾ ഒന്നും തന്നെ ഇതുവരെ കണ്ടെത്താനായിട്ടില്ല. സംഭവത്തിൽ കൂടുതൽ ശാസ്ത്രീയ തെളിവുകൾ ശേഖരിക്കാനുള്ള ശ്രമത്തിലാണ് അന്വേഷണസംഘം.
