ഗോവയിലെ 82 ലക്ഷം ചതുരശ്ര മീറ്റർ ഭൂമി ഇനി വികസനരഹിത മേഖല

ഗോവയിലെ കുന്നുകളും പരിസ്ഥിതിലോല പ്രദേശങ്ങളും സംരക്ഷിക്കുന്നതിനായി 82 ലക്ഷം ചതുരശ്ര മീറ്റർ ഭൂമി വികസനരഹിത മേഖലയായി (No Development Zone) സംസ്ഥാന സർക്കാർ പ്രഖ്യാപിച്ചു. അനിയന്ത്രിത നിർമാണ പ്രവർത്തനങ്ങൾ തടയുന്നതിനും കുന്നുകൾ ഇടിച്ചുനിരത്തുന്നത് ഒഴിവാക്കുന്നതിനുമാണ് ഈ നിർണായക തീരുമാനം കൈക്കൊണ്ടത്. ടൗൺ ആൻഡ് കൺട്രി പ്ലാനിംഗ് ബോർഡിന്റെ അംഗീകാരത്തോടെ മജോർദ, ഗോൺസുവ തുടങ്ങിയ പ്രദേശങ്ങളെ ഇതിൽ ഉൾപ്പെടുത്തിയിട്ടുണ്ട്. ഇതോടൊപ്പം മാന്ദോവി, സുവാരി നദീതീരങ്ങളിലെ 6.72 കോടി ചതുരശ്ര മീറ്റർ പ്രദേശം പരിസ്ഥിതിലോല മേഖലയായി പ്രഖ്യാപിക്കാനുള്ള വനംവകുപ്പിന്റെ നിർദേശത്തിന് കേന്ദ്ര പരിസ്ഥിതി മന്ത്രാലയവും അനുമതി നൽകി. വരും ദിവസങ്ങളിൽ കൃഷിയിടങ്ങളെയും താഴ്ന്ന പ്രദേശങ്ങളെയും ഈ പട്ടികയിൽ ഉൾപ്പെടുത്തി സംരക്ഷിക്കാനാണ് ഗോവൻ സർക്കാർ ലക്ഷ്യമിടുന്നത്.