അറസ്റ്റിലായ അഡീഷണൽ സെക്രട്ടറി ആർ ഹരിയെ അന്വേഷണസംഘം ഇന്ന് കസ്റ്റഡിയിൽ വാങ്ങും. ചെയർമാൻ അടക്കമുള്ളവർക്ക് എതിരെ മൊഴി ലഭിച്ച സാഹചര്യത്തിലാണ് കൂടുതൽ പേരെ ചോദ്യം ചെയ്യുന്നത്.
പി എസ് സി സെക്രട്ടറി നൽകിയ മൊഴി വിശകലനം നടത്തിയ ശേഷമാണ് പരീക്ഷാ കൺട്രോളറെ ചോദ്യം ചെയ്യുന്നത്. പരീക്ഷ കൺട്രോളർ ബിനി കെ എബ്രഹാമിനെ പി എസ് സി ആസ്ഥാനത്ത് വെച്ചാണ് ചോദ്യം ചെയ്യുക. കഴിഞ്ഞ ദിവസം ചോദ്യം ചെയ്യാൻ വിളിപ്പിച്ചിരുന്നെങ്കിലും കസ്റ്റഡിയിൽ വാങ്ങിയ മുൻ പി എസ് സി ഡെപ്യൂട്ടി സെക്രട്ടറി സതീഷിനെ ചോദ്യം ചെയ്യൽ പൂർത്തിയാക്കേണ്ടതിനാലാണ് ചോദ്യം ചെയ്യൽ ഇന്നേക്ക് മാറ്റിയത്. അതേസമയം കേസിൽ അറസ്റ്റിലായ അഡീഷണൽ സെക്രട്ടറി ആർ ഹരിയെ അന്വേഷണസംഘം ഇന്ന് കസ്റ്റഡിയിൽ വാങ്ങും. ഒരു ദിവസത്തെ കസ്റ്റഡിയിൽ വിട്ട ഒന്നാം പ്രതി സതിഷിനെ അന്വേഷണസംഘം വിശദമായി ചോദ്യം ചെയ്തു.
പി എസ് സി നടത്തിയ ആസൂത്രണ ബോർഡ് പരീക്ഷാ തട്ടിപ്പിന്റെ വ്യാപ്തി? ഇതിനുപിന്നിൽ പ്രവർത്തിച്ച മറ്റ് ഉന്നതർ? സതീഷും ആർ ഹരിയും തമ്മിലുള്ള സാമ്പത്തിക ഇടപാടുകൾ എന്നിവയടക്കമാണ് പരിശോധിക്കുന്നത്. ഇത് സംബന്ധിച്ച് ഇരുവരേയും ഒരുമിച്ചിരുത്തി വിശദമായി ചോദ്യം ചെയ്യേണ്ടതുണ്ട്. തുടരന്വേഷണത്തിന്റെ ഭാഗമായി പ്രതികളെ കൂടുതൽ ദിവസം കസ്റ്റഡിയിൽ ആവശ്യപ്പെടാനാണ് അന്വേഷണ സംഘത്തിന്റെ തീരുമാനം. പി എസ് സി ചെയർമാൻ ഉൾപ്പെടെഉള്ളവർക്കെതിരെ മൊഴി ലഭിച്ച സാഹചര്യത്തിലാണ് വ്യക്തത വരുത്താൻ കൂടുതൽ പേരെ ചോദ്യം ചെയ്യുന്നത്.
ആസൂത്രണ ബോർഡ് പരീക്ഷ ഉൾപ്പെടെ നാല് ക്രമക്കേടുകൾ ആണ് എസ് ഐ ടി എഫ് ഐ ആർ രജിസ്റ്റർ ചെയ്തിട്ടുള്ളത്. ഡിവൈഎസ്പി നിയമന ക്രമക്കേട് സംബന്ധിച്ച പരാതിയും എസ്ഐടിയുടെ അന്വേഷണത്തിന് കൈമാറിയിട്ടുണ്ട്. ആഭ്യന്തര വകുപ്പ് മന്ത്രിക്ക് ലഭിച്ച പരാതിയാണ് എസ്ഐടി പരിഗണിക്കപ്പെട്ടത്. പരാതിയിൽ പ്രാഥമിക പരിശോധന നടത്തിയ ശേഷം കേസ് രജിസ്റ്റർ ചെയ്യുന്നത് ഉൾപ്പെടെയുള്ള നടപടിക്രമങ്ങളിലേക്ക് കടക്കും.
