അനസ് ഓപ്പറേഷൻ തൂഫാൻ റെയ്ഡ് വിവരങ്ങൾ ചോർത്തി നൽകിയതായി നിഗമനമുണ്ട്. മോഷ്ടിച്ച 87 ഗ്രാം എംഡിഎംഎയ്ക്കു പകരം അനസ് തിരിച്ചുവച്ചത് 200 ഗ്രാം എംഡിഎംഐ ആണെന്നും വ്യക്തമായി. അനസിനെ സർവീസിൽ നിന്ന് പുറത്താക്കണമെന്ന് സിപിഐഎം ആവശ്യപ്പെട്ടു.
പോലീസിനാകെ നാണക്കേട് ഉണ്ടാക്കുന്ന നടപടിയാണ് സെൻട്രൽ സ്റ്റേഷനിലെ എസ് ഐ അനസ് തൗഫിക്കിന്റേത്. ഈ മാസം 15 നും 26 ഇടയിലാണ് മോഷണം നടത്തിയത്. വിൽപ്പന നടത്താനാണ് എംഡിഎംഎ മോഷ്ടിച്ചത്. ഇതിനായി ലഹരി മാഫിയ സംഘവുമായി ഇയാൾ ഡീൽ ഉറപ്പിച്ചിരുന്നു. മോഷണ വിവരം അറിയുന്നതിന് മുൻപ് തന്നെ എംഡിഎംഎ വിറ്റതോടെ ലഹരി മരുന്ന് തിരികെ വെച്ച് രക്ഷപ്പെടാൻ ശ്രമം നടത്തി. മോഷ്ടിച്ച 87 ഗ്രാമിന് പകരം തിരിച്ചുവെച്ചത് 200 ഗ്രാം എംഡിഎംഎ. ഈ ലഹരി മരുന്ന് എവിടെ നിന്ന് ലഭിച്ചു എന്നാണ് പോലീസ് അന്വേഷിക്കുന്നത്. ലഹരി മാഫിയ സംഘവുമായുള്ള പോലീസ് ബന്ധത്തിലേക്കാണ് ഇത് വിരൽചൂണ്ടുന്നത്. ലഹരിയുടെ ഉറവിടം കണ്ടെത്താനുള്ള അന്വേഷണത്തിലേക്ക് പോലീസ് കടന്നു. ഓപ്പറേഷൻ തൂഫാനുമായി മുന്നോട്ടുപോകുന്ന സർക്കാരിന് ആത്മാർത്ഥത ഉണ്ടെങ്കിൽ അനസിനെ സർവീസിൽ നിന്ന് പുറത്താക്കണമെന്ന് സിപിഐഎം എറണാകുളം ജില്ലാ സെക്രട്ടറി എസ് സതീഷ് ബിഗ് ടിവിയോട് പറഞ്ഞു.
മോഷണക്കേസിൽ കൂടുതൽ ഉദ്യോഗസ്ഥർക്ക് പങ്കുണ്ടോ എന്നും പോലീസ് അന്വേഷിക്കുന്നുണ്ട്. മോഷണം കയ്യോടെ പിടികൂടിയിട്ടും എസ് ഐ സർവീസിൽ തുടർന്നു. ബിഗ് ടി വി വാർത്ത പുറത്തുവിട്ടതിന് പിന്നാലെയാണ് വകുപ്പ് തല നടപടിയും അറസ്റ്റിലേക്കും കടന്നത്. സംഭവത്തിൽ സെൻട്രൽ സ്റ്റേഷനിലേക്ക് ഡിവൈഎഫ്ഐ മാർച്ച് നടത്തി.
