മുൻ കണ്ണൂർ ജില്ലാ പഞ്ചായത്ത് പ്രസിഡൻറ് പി.പി.ദിവ്യയുടെ ബെനാമി സ്ഥാപനമെന്ന ആരോപണം നേരിടുന്ന കാർട്ടൺ ഇന്ത്യയിൽ നിന്ന് സിപിഐഎം നേതാക്കൾക്കും ദിവ്യയുടെ ബന്ധുക്കൾക്കും പണം. കമ്പനിയുടെ എംഡി പണം നൽകിയതിനുള്ള തെളിവുകളാണ് പുറത്ത് വന്നത്. കാസർഗോഡ് ജില്ലാ പഞ്ചായത്ത് മുൻ പ്രസിഡൻറിൻറേയും വൈസ് പ്രസിഡൻറിൻറേയും പേരുകൾ പട്ടികയിലുണ്ട്. ശബ്ദവും സ്ക്രീൻ ഷോട്ടുകളും തൻറേതല്ലെന്ന് എംഡി മുഹമ്മദ് ആസിഫ് പ്രതികരിച്ചു.
കാർട്ടൺ ഇന്ത്യ എംഡി മുഹമ്മദ് ആസിഫിൻറേതെന്ന പേരിലാണ് ശബ്ദരേഖ പ്രചരിക്കുന്നത്. കാസർഗോഡ് ജില്ലാ പഞ്ചായത്ത് മുൻ പ്രസിഡൻറ് ബേബി ബാലകൃഷ്ണനും മുൻ വൈസ് പ്രസിഡൻറ് ഷാനവാസ് പാദൂരും പണം വാങ്ങിയെന്നാണ് ഇതിൽ പറയുന്നത്. കാസർഗോഡ് ജില്ലാ പഞ്ചായത്തിൻറെ പ്രീ ഫാബ് ടോയ്‍ലറ്റ് നിർമാണത്തിൻ കരാർ കാർട്ടൺ ഇന്ത്യക്കായിരുന്നു. 22 സ്കൂളുകളിലാണ് ശുചിമുറി നിർമിച്ചത്. ഇതിൽ അഴിമതി ഉണ്ടെന്ന് ആരോപണം ഉയർന്നിരുന്നു. ശബ്ദരേഖക്കൊപ്പം പണം കൈമാറ്റത്തിന്റെ സ്ക്രീൻ ഷോട്ടുകളുമുണ്ട്. പി.പി.ദിവ്യയുടെ സഹോദരൻ അനൂപ്, ഡ്രൈവർ വൈശൈാഖ്, സിൽക്കിലെ ഉയർന്ന ഉദ്യോഗസ്ഥൻറെ ഭാര്യ, ബേബി ബാലകൃഷ്ണന്റെ മകൻ കിരൺ
ബാലകൃഷ്ണൻ എന്നിവർക്ക് പണം അയച്ചു എന്ന തരത്തിലാണ് സ്ക്രീൻ ഷോട്ടുകൾ പ്രചരിക്കുന്നത്. പണമോ മറ്റ് സമ്മാനങ്ങളോ കൈപ്പറ്റിയിട്ടില്ലെന്ന് ഷാനവാസ് പാദൂരും ബേബി ബാലകൃഷണനും അനൂപും വൈശാഖും പ്രതികരിച്ചു. കേസ് പിൻവലിക്കാൻ KSU വൈസ് പ്രസിഡൻ്റ് മുഹമ്മദ് ഷമ്മാസ് 5 ലക്ഷം ആവശ്യപ്പെട്ടെന്നും ശബ്ദം തൻറേതല്ലെന്നുമാണ് എംഡി മുഹമ്മദ് ആസിഫിൻറെ വാദം.
ശബ്ദരേഖ സംബന്ധിച്ച് അന്വേഷണം നടത്തണമെന്ന് ആവശ്യപ്പെട്ട് മുഹമ്മദ് ആസിഫ് മുഖ്യമന്ത്രിക്ക് പരാതി നൽകി. പി.പി. ദിവ്യക്കെതിരേ കൂടുതൽ തെളിവുകൾ നാളെ പുറത്ത് വിടുമെന്ന് പരാതിക്കാരൻ മുഹമ്മദ് ഷമ്മാസ് പറഞ്ഞു.
.
