സിൽവർലൈൻ പദ്ധതിക്കായി വിഭാവനം ചെയ്ത ഭൂമിയേറ്റെടുക്കൽ സംവിധാനങ്ങൾ; അങ്കമാലി-എരുമേലി ശബരിപാതയ്ക്കായി ഉപയോഗിക്കാനുള്ള റവന്യൂ വകുപ്പിന്റെ നിർണായക ശുപാർശ ചുവപ്പുനാടയിൽ.
റവന്യൂ വകുപ്പിൽ നിന്ന് ആവർത്തിച്ച് നിർദ്ദേശങ്ങൾ ഉണ്ടായിട്ടും ലാൻഡ് റവന്യൂ കമ്മീഷണറുടെ ഭാഗത്തുനിന്ന് തുടർനടപടികൾ ഉണ്ടാകാതായതോടെ പദ്ധതിയ്ക്കായുള്ള ഭൂമി ഏറ്റെടുക്കൽ പ്രതിസന്ധിയിലാണ്.
പദ്ധതിക്കായി റവന്യൂ വകുപ്പിൽ നിന്ന് ആറ് കത്തുകളാണ് ലാൻഡ് റവന്യൂ കമ്മീഷണർക്ക് അയച്ചത്. എന്നാൽ ഇതിലൊന്നിലും തുടർനടപടികൾ ഉണ്ടായിട്ടില്ല. ശബരി റെയിൽ പദ്ധതിക്കായി ഇടുക്കി, എറണാകുളം, കോട്ടയം ജില്ലകളിലാണ് ഭൂമിയേറ്റെടുക്കൽ ഓഫീസുകൾ അടിയന്തരമായി ആരംഭിക്കേണ്ടത്. ഇതിനായി സിൽവർലൈൻ ഓഫീസുകളും അവിടുത്തെ തസ്തികകളും പുനരുപയോഗിക്കാനായിരുന്നു ശുപാർശ. ശബരി പദ്ധതിയുടെ പകുതി ചെലവ് സംസ്ഥാന സർക്കാർ വഹിക്കുന്നത് സംബന്ധിച്ച ഫയൽ ഇപ്പോൾ ധനവകുപ്പിന്റെ സജീവ പരിഗണനയിലാണ്. 1,900 കോടി രൂപയാണ് സംസ്ഥാന വിഹിതമായി കേരളം നൽകേണ്ടത്. കേന്ദ്ര ബജറ്റിൽ പദ്ധതിക്കായി 505 കോടി രൂപ അനുവദിച്ച് ഉത്തരവായിട്ടുണ്ട്. കേന്ദ്ര വിഹിതം ലഭ്യമായ പശ്ചാത്തലത്തിൽ സംസ്ഥാന സർക്കാർ ഭൂമി ഏറ്റെടുത്തു നൽകിയാൽ മാത്രമേ ശബരി പാതയുടെ യഥാർത്ഥ നിർമ്മാണ പ്രവർത്തനങ്ങളിലേക്ക് കടക്കാൻ കഴിയൂ. എന്നാൽ ഭൂമിയേറ്റെടുക്കൽ ഓഫീസുകൾ സ്ഥാപിക്കുന്നതിലെ ഉദ്യോഗസ്ഥ തലത്തിലുള്ള മെല്ലെപ്പോക്ക് പദ്ധതിയെ വീണ്ടും അനിശ്ചിതത്വത്തിലാക്കുകയാണ്.
