പ്രതി സിബിയോണുമായി ഉത്തരേന്ത്യക്കാരനായ വ്യക്തിക്ക് ഇടപാടുകളുണ്ടെന്നാണ് സൂചന. ഇരുവരും കൊല്ലത്തെ ഹോട്ടലിൽ ഒരുമിച്ച് താമസിച്ചിരുന്നുവെന്ന് ജില്ലാ ക്രൈം ബ്രാഞ്ച് കണ്ടെത്തി. കൊല്ലത്തെ വ്യവസായിയെ കേന്ദ്രീകരിച്ചും അന്വേഷണം നടക്കുന്നുണ്ട്. കേസിൽ ഇ.ഡി അന്വേഷണത്തിൻ്റെ സാധ്യത തേടാൻ ക്രൈം ബ്രാഞ്ചിൽ നീക്കം ആരംഭിച്ചു.
കൊല്ലം കള്ളനോട്ട് കേസ് പുതിയ തലത്തിലേക്ക് കടക്കുകയാണ്. കേസിലെ മുഖ്യപ്രതിയായ സിബിയോണിന് സംസ്ഥാനത്തിന് പുറത്തുള്ള സംഘങ്ങളുമായും കള്ളപ്പണ ഇടപാട് ഉണ്ടായിരുന്നു എന്നാണ് ക്രൈംബ്രാഞ്ച് കണ്ടെത്തൽ. സിബിയോണിന് ഒപ്പം കൊല്ലത്തെ സ്വകാര്യ ഹോട്ടലിൽ ഉണ്ടായിരുന്നത് ഉത്തരേന്ത്യക്കാരനാണ് എന്ന വിവരം ക്രൈംബ്രാഞ്ചിന് ലഭിച്ചു. ഇയാൾ എന്തിനെത്തി എന്ന കാര്യം സിബിയോൺ വ്യക്തമായി ക്രൈംബ്രാഞ്ചിനോട് പറഞ്ഞിട്ടില്ല. സൗഹൃദം മാത്രം എന്നാണ് സിബിയോണിൻ്റെ മറുപടി.
സിബിയോണുമായി പണമിടപാട് നടത്തിയ കൊല്ലംകാരനായ വ്യവസായിയെ ഉടൻ ചോദ്യം ചെയ്യാൻ ക്രൈം ബ്രാഞ്ച് തീരുമാനിച്ചു. ഇയാൾ വഴിയാണ് സിബിയോൺ കൂടുതൽ ഇടപാട് നടത്തിയതെന്നാണ് വിവരം. സിബിയോണിൻ്റെ ബാങ്ക് ഇടപാടുകളിൽ പരിശോധന തുടരുകയാണ്. ഇടപാടുകൾ അന്വേഷിക്കാൻ ആദായ നികുതി വകുപ്പിൻ്റെ സഹായം കൂടി ക്രൈം ബ്രാഞ്ച് തേടിയിട്ടുണ്ട്. അതേസമയം ഇ ഡി അന്വേഷണത്തിൻ്റെ സാധ്യത കൂടി ക്രൈം ബ്രാഞ്ച് തേടിയെന്നാണ് വിവരം. കസ്റ്റഡിയിൽ ഇരുന്ന ഘട്ടത്തിൽ ക്രൈം ബ്രാഞ്ചിനെ വട്ടം ചുറ്റിക്കാൻ സിബിയോൺ നിരവധി തവണ ശ്രമിച്ചു. 5 ദിവസം കസ്റ്റഡിയിൽ ചോദ്യം ചെയ്തിട്ടും കൃത്യമായ ഉത്തരങ്ങൾ സിബിയോൺ നൽകിയില്ല. പരസ്പര വിരുദ്ധമായ മറുപടികൾ ആവർത്തിക്കുകയും ചെയ്തു.
