പാലക്കാട് മണ്ണാർക്കാട് ഓടിക്കൊണ്ടിരുന്ന സ്കൂൾ ബസിന്റെ ഡോർ യാത്രയ്ക്കിടെ തെറിച്ചുവീണ സംഭവത്തിൽ നടപടി എടുത്ത് മോട്ടോർ വാഹന വകുപ്പ്. പരിശോധനയിൽ ക്രമക്കേടുകൾ കണ്ടെത്തിയ എട്ടോളം വാഹനങ്ങൾക്കെതിരെ കേസെടുത്ത് പിഴ ചുമത്തി.ഇന്നലെ രാവിലെ കുട്ടികളുമായി സ്കൂളിലേക്ക് പോകുന്നതിനിടെയാണ് തച്ചമ്പാറയിലെ ദേശബന്ധു ഹയർ സെക്കൻഡറി സ്കൂൾ ബസിന്റെ ഡോർ റോഡിലേക്ക് തെറിച്ചുവീണത്. ഭാഗ്യവശാൽ വലിയ അപകടം ഒഴിവായെങ്കിലും സംഭവം സ്കൂൾ വാഹനങ്ങളുടെ സുരക്ഷയെക്കുറിച്ചുള്ള ആശങ്ക വർധിപ്പിച്ചു.
സ്കൂൾ തുറക്കുന്നതിന് മുമ്പ് ജില്ലയിലെ സ്കൂൾ ബസുകളുടെ ഫിറ്റ്നസ് പരിശോധന മോട്ടോർ വാഹന വകുപ്പ് പൂർത്തിയാക്കിയിരുന്നുവെങ്കിലും അപകടത്തിൽപ്പെട്ട വാഹനം പരിശോധനയ്ക്ക് ഹാജരാക്കിയിരുന്നില്ലെന്നാണ് കണ്ടെത്തൽ. സ്കൂൾ തുറന്നതിന് ശേഷം അടിയന്തരമായി സർവീസിന് ഇറക്കിയ ബസാണിതെന്നായിരുന്നു അധികൃതരുടെ വിശദീകരണം. ആലപ്പുഴയിലെ ഒരു സ്കൂളിൽ നിന്നാണ് വാഹനം കൊണ്ടുവന്നതെന്നും വ്യക്തമാക്കിയിട്ടുണ്ട്.
പെർമിറ്റ് ഇല്ലാത്തതും, ഇൻഷുറൻസ് ഇല്ലാത്തതും, ഫിറ്റ്നെസ്സ് ഇല്ലാത്തതുമായ സ്കൂൾബസ്സുകളാണ് കുട്ടികൾക്കായി ദേശബന്ധു ഹയർ സെക്കന്ററി സ്കൂൾ ഉപയോഗിക്കുന്നതെന്ന് മോട്ടോർ വാഹന വകുപ്പ് കണ്ടെത്തി. ക്രമക്കേടുകൾ കണ്ടെത്തിയ എട്ടോളം വാഹനങ്ങൾക്കെതിരെ കേസ്സെടുത്ത് 30,000രൂപ പിഴ ചുമത്തിയതായി മണ്ണാർക്കാട് മോട്ടോർ വാഹന വകുപ്പ് ഇൻസ്പെക്ടർ പിഎം രവികുമാർ പറഞ്ഞു
വരും ദിവസങ്ങളിലും ജില്ലയിൽ ഉടനീളം പരിശോധന ശക്തമാക്കുമെന്നും, നിയമലംഘനം കണ്ടെത്തിയാൽ കർശന നടപടിയെടുക്കുമെന്നും എംവിഡി അറിയിച്ചു.
