‘നിയമപരമായ അധികാരപരിധി മറികടക്കരുത്. മറ്റ് സ്ഥാപനങ്ങളുടെ നിയമപരമായ അധികാരപരിധിയിൽ ഇടപെടാൻ നിയമം നൽകിയ അധികാരം ഉപയോഗിക്കരുത്’ : സുപ്രിംകോടതി
കേന്ദ്ര അന്വേഷണ ഏജൻസിയായ എൻഫോഴ്‌സ്‌മെന്റ് ഡയറക്ടറേറ്റിന്റെ (ഇ.ഡി.) അധികാരപ്രയോഗത്തിന് വ്യക്തമായ മുന്നറിയിപ്പുമായി സുപ്രീംകോടതി. മറ്റ് അന്വേഷണ ഏജൻസികളുടെ നിയമപരമായ അധികാരപരിധിയിൽ ഇ.ഡി. കൈകടത്തരുതെന്ന് കോടതി നിർദേശിച്ചു. സി.എം.ആർ.എൽ–എക്സാലോജിക് കേസിൽ മുഖ്യമന്ത്രി പിണറായി വിജയനും കുടുംബാംഗങ്ങൾക്കുമെതിരായ അഴിമതി എഫ്.ഐ.ആറിലെ അന്വേഷണം താൽക്കാലികമായി തടഞ്ഞുകൊണ്ടായിരുന്നു സുപ്രീംകോടതിയുടെ നിർണായക നിരീക്ഷണങ്ങൾ.
ഇ.ഡി.യുടെ വിവരങ്ങളുടെ അടിസ്ഥാനത്തിൽ അഴിമതി കേസ് രജിസ്റ്റർ ചെയ്യാൻ സംസ്ഥാന പോലീസിന് നിർബന്ധബാധ്യതയുണ്ടോയെന്ന നിയമപ്രശ്നമാണ് സുപ്രീംകോടതി പ്രധാനമായും പരിശോധിച്ചത്. കള്ളപ്പണ ഇടപാടുകൾ അന്വേഷിക്കാനും പി.എം.എൽ.എ. പ്രകാരം നടപടികൾ സ്വീകരിക്കാനും ഇ.ഡി.യ്ക്ക് അധികാരമുണ്ടെന്ന് വ്യക്തമാക്കിയ കോടതി, ആ അധികാരം ഉപയോഗിച്ച് മറ്റ് ഏജൻസികളുടെ നിയമപരമായ അധികാരപരിധിയിൽ ഇടപെടാനാകില്ലെന്ന് ഓർമിപ്പിച്ചു. ജസ്റ്റിസുമാരായ ജോയ്മാല്യ ബാഗ്ചി, വി.മഹാദേവൻ എന്നിവരടങ്ങിയ ബെഞ്ചാണ് കേസ് പരിഗണിച്ചത്.
ഇ.ഡി.യുടെ അധികാരത്തിന് പരിധിയുണ്ട്
കള്ളപ്പണ ഇടപാടുകളെക്കുറിച്ച് അന്വേഷിക്കാനും കുറ്റം തെളിയുന്നപക്ഷം നിയമനടപടികളുമായി മുന്നോട്ടുപോകാനും ഇ.ഡി.യ്ക്ക് അധികാരമുണ്ടെന്ന് കോടതി വ്യക്തമാക്കി. എന്നാൽ, കള്ളപ്പണ നിരോധന നിയമത്തിലെ (പി.എം.എൽ.എ.) 66(2) വകുപ്പ് പ്രകാരം സംസ്ഥാനത്തിന് വിവരം കൈമാറിയതുകൊണ്ടുമാത്രം സംസ്ഥാന അന്വേഷണ ഏജൻസിയുടെ തുടർനടപടികൾ സ്വയം നിർണയിക്കാൻ ഇ.ഡി.യ്ക്ക് കഴിയുമോയെന്നതാണ് കോടതി പരിശോധിച്ചത്.
പി.എം.എൽ.എ. പ്രകാരമുള്ള അന്വേഷണം തുടരാനും നിയമപ്രകാരമുള്ള പ്രോസിക്യൂഷൻ നടപടികൾ സ്വീകരിക്കാനും ഇ.ഡി.യ്ക്ക് തടസ്സമില്ല. എന്നാൽ, ഇ.ഡി. നൽകിയ വിവരത്തിന്റെ അടിസ്ഥാനത്തിൽ അഴിമതി നിരോധന നിയമപ്രകാരം എഫ്.ഐ.ആർ. രജിസ്റ്റർ ചെയ്ത് അന്വേഷണം ആരംഭിക്കേണ്ടതുണ്ടോയെന്ന് ബന്ധപ്പെട്ട സംസ്ഥാന ഏജൻസി നിയമത്തിന്റെ ചട്ടക്കൂടിൽ പരിശോധിക്കേണ്ടതുണ്ടെന്ന് കോടതി നിരീക്ഷിച്ചു.
‘നിയമപരമായ അധികാരപരിധി മറികടക്കരുത്. മറ്റ് സ്ഥാപനങ്ങളുടെ നിയമപരമായ അധികാരപരിധിയിൽ ഇടപെടാൻ നിയമം നൽകിയ അധികാരം ഉപയോഗിക്കരുത്’ എന്നായിരുന്നു ഇ.ഡി.യുടെ അഭിഭാഷകനോടുള്ള ജസ്റ്റിസ് ജോയ്മാല്യ ബാഗ്ചിയുടെ മുന്നറിയിപ്പ്.
വിവരം കൈമാറിയാൽ എഫ്.ഐ.ആർ. നിർബന്ധമാണോ?
പി.എം.എൽ.എ.യിലെ 66(2) വകുപ്പ് പ്രകാരം ഇ.ഡി. നൽകുന്ന വിവരത്തിന്റെ അടിസ്ഥാനത്തിൽ സംസ്ഥാന പോലീസ് നിർബന്ധമായും എഫ്.ഐ.ആർ. രജിസ്റ്റർ ചെയ്യണമോയെന്നതാണ് കേസിലെ പ്രധാന നിയമപ്രശ്നം.
വിവരത്തിൽ തിരിച്ചറിയാവുന്ന കുറ്റകൃത്യം വെളിപ്പെടുന്നുണ്ടെങ്കിൽ എഫ്.ഐ.ആർ. രജിസ്റ്റർ ചെയ്യേണ്ടതുണ്ടെന്നായിരുന്നു ഇ.ഡി.യുടെ വാദം. എന്നാൽ, ഇ.ഡി.യുടെ കത്ത് ലഭിക്കുന്നതോടെ സംസ്ഥാന പോലീസിന്റെ അധികാരം അവസാനിക്കുന്നുണ്ടോയെന്നും പ്രാഥമിക പരിശോധന ഉൾപ്പെടെയുള്ള നടപടികൾ സ്വീകരിക്കാൻ സംസ്ഥാന ഏജൻസിക്ക് അധികാരമുണ്ടോയെന്നും കോടതി പരിശോധിച്ചു.
രാജ്യത്തെ ഇ.ഡി. അന്വേഷണങ്ങളിൽ പ്രതിഫലനമുണ്ടാകുമോ?
ഇ.ഡി.യുടെ അധികാരപരിധിയും മറ്റ് അന്വേഷണ ഏജൻസികളുടെ നിയമപരമായ അധികാരവും തമ്മിലുള്ള അതിർവരമ്പുകൾ സംബന്ധിച്ച സുപ്രീംകോടതിയുടെ നിരീക്ഷണങ്ങൾ ദേശീയതലത്തിൽ ശ്രദ്ധേയമാണ്. ഇ.ഡി. നൽകുന്ന വിവരങ്ങൾ സംസ്ഥാന പോലീസ് എങ്ങനെ കൈകാര്യം ചെയ്യണം, അത്തരം വിവരങ്ങൾ എഫ്.ഐ.ആർ. രജിസ്റ്റർ ചെയ്യുന്നതിന് മതിയായ അടിസ്ഥാനമാണോ, സംസ്ഥാന ഏജൻസിക്ക് നിയമപരമായ പരിശോധന നടത്താൻ കഴിയുമോ തുടങ്ങിയ ചോദ്യങ്ങളാണ് കേസിലൂടെ ഉയരുന്നത്.
