പ്രതിപക്ഷ ഉപനേതാവിനെ ചൊല്ലിയുള്ള സിപിഐഎം–സിപിഐ ഉഭയകക്ഷി ചർച്ച തുടരും. വിഷയം വീണ്ടും ചർച്ച ചെയ്യാമെന്ന സിപിഐഎം നിലപാടിനെ തുടർന്നാണ് സിപിഐ മുന്നണി യോഗത്തിൽ ആവശ്യം ഉന്നയിക്കാതിരുന്നത്.
അടുത്ത മാസം അവസാനം വീണ്ടും എൽഡിഎഫ് യോഗം ചേരുന്നുണ്ട്. സിപിഐഎമ്മിന്റെ വിശാല നേതൃയോഗത്തിന് ശേഷമായിരിക്കും സെപ്റ്റംബർ അവസാന വാരത്തിലെ എൽഡിഎഫ് യോഗം. അതിനുള്ളിൽ വിഷയത്തിൽ പരിഹാരം ഉണ്ടാക്കാമെന്നാണ് ഇരു പാർട്ടികളുടെയും ധാരണ.
എൽഡിഎഫ് യോഗത്തിന് പിന്നാലെ ഇന്ന് സിപിഐഎം സംസ്ഥാന സെക്രട്ടറിയേറ്റും ചേരും. ഡിവൈഎഫ്ഐ സംസ്ഥാന സമ്മേളനത്തിന് മുന്നോടിയായി സംസ്ഥാന ഭാരവാഹികളുടെ പട്ടികയ്ക്ക് സെക്രട്ടറിയേറ്റ് അംഗീകാരം നൽകും.
എം. വിജിൻ എംഎൽഎയെ സെക്രട്ടറിയായും ചിന്താ ജെറോമിനെ പ്രസിഡന്റായും ഉൾപ്പെടുത്തിയാണ് പട്ടിക തയ്യാറാക്കിയിരിക്കുന്നത്. സംസ്ഥാന സെക്രട്ടറിയേറ്റ് അംഗീകരിക്കുന്ന പട്ടിക ഓഗസ്റ്റ് 19 മുതൽ 22 വരെ തൃശൂരിൽ നടക്കുന്ന ഡിവൈഎഫ്ഐ സംസ്ഥാന സമ്മേളനത്തിൽ അവതരിപ്പിക്കും.
