എക്സിറ്റ് പോൾ പ്രവചനത്തിന് സമ്മിശ്ര പ്രതികരണങ്ങളുമായി കേരളത്തിലെ മൂന്ന് മുന്നണികളും. വിജയപ്രതീക്ഷയുണ്ടെങ്കിലും എക്സിറ്റ്പോൾ പ്രതീക്ഷിക്കുന്നത്ര ഉയർന്നില്ല എന്നതാണ് യുഡിഎഫിന്റെ പ്രതികരണം. ഭരണവിരുദ്ധ വികാരം ശക്തമാണെന്നും അതുകൊണ്ട് നൂറിലധികം സീറ്റുകൾ വിജയിക്കാൻ ആകും എന്നതും ആയിരുന്നു യുഡിഎഫിന്റെ പ്രതീക്ഷ. പക്ഷേ ആ പ്രതീക്ഷയ്ക്ക് പൂർണപിന്തുണ എക്സിറ്റ് പോളുകൾ ഒന്നും നൽകുന്നില്ല. അതുകൊണ്ടുതന്നെ എക്സിറ്റ് പോളുകളിൽ വിശ്വസിക്കുന്നില്ലെന്ന നിലപാടിലാണ് യുഡിഎഫ് കേന്ദ്രങ്ങൾ.
അതേസമയം ഭരണവിരുദ്ധ വികാരം ഇല്ലെന്ന മുൻ നിലപാട് ആവർത്തിക്കുകയാണ് ഇടതുമുന്നണി. എക്സിറ്റ് പോളുകൾക്ക് അപ്പുറമുള്ള വിജയമാണ് മുന്നണി പ്രതീക്ഷിക്കുന്നു. മൂന്നാം പിണറായി സർക്കാർ വരുമെന്ന് ഇപ്പോഴും ഉറപ്പിക്കുന്നു ഇടതു കേന്ദ്രങ്ങൾ.
ഇതിനിടയിലും പരസ്യമായി പറയുന്നില്ലെങ്കിലും വലിയ സന്തോഷത്തിലാണ് എൻഡിഎ. കേരളത്തിൽ അക്കൗണ്ട് തുറക്കുകയും അത് രണ്ടിൽ കൂടുതൽ ആവുകയും ചെയ്യാൻ കഴിയുമെന്നാണ് എക്സിറ്റ്പോൾ പ്രവചനം. അതിൽ എൻഡിഎ വലിയ വിശ്വാസം കൊടുക്കുന്നു.
