കടത്ത് സ്വർണം കവർച്ച നടത്താനായി കരിപ്പൂരിൽ എത്തിയത് എട്ടംഗ പൊട്ടിക്കൽ സംഘമെന്ന് പോലീസ്. ഇതോടെ കേസിൽ പ്രതി ചേർത്തവരുടെ എണ്ണം പത്തായി. FIR പകർപ്പ് ബിഗ് ടിവിക്ക് ലഭിച്ചു.
ദുബായിൽ നിന്നും തലശ്ശേരി സ്വദേശിനിയായ പ്രിയങ്ക കരിപ്പൂർ വിമാനത്താവളം വഴി 18 പവൻ സ്വർണം കടത്തിയ കേസിലാണ് കൂടുതൽ പേരെ പ്രതിപ്പട്ടികയിൽ ഉൾപ്പെടുത്തിയത്. കടത്തിയ സ്വർണം കവർച്ച നടത്താൻ പ്രിയങ്ക തന്നെ ആസൂത്രണം നടത്തിയതും കണ്ണൂർ കേന്ദ്രീകരിച്ച് ഉള്ള പൊട്ടിക്കൽ സംഘത്തിന് കോട്ടേഷൻ നൽകിയതും പോലീസ് കണ്ടെത്തിയിരുന്നു. ഈ പൊട്ടിക്കൽ സംഘത്തിൽ ഉൾപ്പെട്ട മൂന്ന് പേരെയാണ് പോലീസ് പിന്തുടർന്ന് സാഹസികമായി പിടികൂടിയത്. കണ്ണൂർ സ്വദേശികളായ ശ്രീലാൽ, പ്രിൻസ്, സുബിത്ത് എന്നിവരാണ് അറസ്റ്റിലായത്.
എന്നാൽ ഇവർക്ക് പുറമെ മറ്റൊരു കാറിൽ ഇതേ സംഘത്തിൽ പെട്ട അഞ്ച് പേർ കൂടി സ്വർണം കവർച്ച നടത്താൻ എത്തിയിരുന്നുവെന്നാണ് പോലീസ് കണ്ടെത്തൽ. എന്നാൽ സ്വർണ കവർച്ച ശ്രമത്തിനിടെ പോലീസ് ഇടപെട്ടതോടെ അഞ്ചംഗ സംഘം കടന്ന് കളഞ്ഞു. മറ്റൊരു കാറിൽ ഇവർ രക്ഷപെട്ടന്നാണ് അറസ്റ്റിലായ പ്രതികൾ പൊലീസിന് നൽകിയ മൊഴി. കണ്ണൂർ സ്വദേശികളായ ലിബിൻ, ആദർശ്, യദു, ചിക്കു, അജേഷ് എന്നിവരാണ് രക്ഷപ്പെട്ടത്. ഇവരും കണ്ണൂർ കേന്ദ്രീകരിച്ചുള്ള പൊട്ടിക്കൽ സംഘമെന്നാണ് പോലീസ് നൽകുന്ന വിവരം. ഇതോടെ കേസിൽ പ്രതി ചേർത്തവരുടെ എണ്ണം പത്തായി. കവർച്ച കുറ്റം, കവർച്ചക്ക് വേണ്ടിയുള്ള ഗൂഢാലോചന ഉൾപ്പടെയുള്ള കുറ്റങ്ങൾ ചുമത്തിയാണ് പോലീസ് FIR.
