മലപ്പുറം പുത്തനത്താണിയിൽ ആനക്കൊമ്പുമായി ഏഴുപേരെ വനം വകുപ്പ് പിടികൂടി. ആനക്കൊമ്പ് കടത്താൻ ശ്രമിച്ച രണ്ട് വാഹനങ്ങളും ലൈസൻസില്ലാത്ത റിവോൾവറും വനം ഇന്റലിജൻസ് വിഭാഗം കസ്റ്റഡിയിലെടുത്തു.തിരുവനന്തപുരം വനം ഇന്റലിജൻസിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ നിലമ്പൂർ റേഞ്ച് ഫ്ലയിങ് സ്ക്വാഡും കാളികാവ് റേഞ്ച് ഓഫീസും സംയുക്തമായി നടത്തിയ തെരച്ചിലിലാണ് പ്രതികൾ പിടിയിലായത്.
മലപ്പുറം പുത്തനത്താണി സ്വദേശി സമീർ ബാബു, തൃശൂർ ചാവക്കാട് സ്വദേശികളായ ഷമീർ ഹസ്സൻ, സുബൈർ, മലപ്പുറം തിരൂർ സ്വദേശികളായ ജംഷീർ, അബ്ദുൽ ജബാർ, ഷോബിഷ്, വയനാട് മേപ്പാടി സ്വദേശി ഫൈസൽ എന്നിവരാണ് പിടിയിലായത്.
പിടികൂടിയ ആനക്കൊമ്പിന് മൂന്നര കിലോ തൂക്കമുണ്ട്. രണ്ടാഴ്ച മുമ്പ് കോഴിക്കോട് താമരശേരിയിലും ആനക്കൊമ്പുകളുമായി പ്രതികൾ വനം വകുപ്പിന്റെ പിടിയിലായിരുന്നു.ആനക്കൊമ്പിന് പുറമേ കടത്തിന് ഉപയോഗിച്ച രണ്ട് വാഹനങ്ങളും മാരകായുധങ്ങളായ ഒരു പിസ്റ്റളും രണ്ട് കത്തികളും ഇവരിൽ നിന്ന് കസ്റ്റഡിയിലെടുത്തു. സംഭവത്തിൽ വനംവകുപ്പ് ഉന്നതതല അന്വേഷണം ആരംഭിച്ചിട്ടുണ്ട്.
