കാസർഗോഡ് സ്കൂൾ ക്വിസ് മത്സരത്തിൽ വി.ഡി. സവർക്കറെക്കുറിച്ചുള്ള വിവാദ ചോദ്യം ഉൾപ്പെടുത്തിയതിനെ തുടർന്ന് സസ്പെൻഡ് ചെയ്ത അധ്യാപകന്റെ ഹർജി ഹൈക്കോടതി നാളെ പരിഗണിക്കും. മറുപടി നൽകാൻ പൊതുവിദ്യാഭ്യാസ വകുപ്പിന് നാളെ വരെ കോടതി സാവകാശം നൽകി.
സർക്കാരിന്റെ മറുപടി കൂടി ലഭിച്ച ശേഷം പള്ളിത്തടുക്ക എയുപി സ്കൂളിലെ അധ്യാപകൻ ഗുരുപ്രസാദിന്റെ സസ്പെൻഷൻ സ്റ്റേ ചെയ്യുന്നതിൽ ഹൈക്കോടതി തീരുമാനമെടുക്കും. അധ്യാപകനെ സസ്പെൻഡ് ചെയ്യാൻ സർക്കാരിന് അധികാരമുണ്ടെന്ന് ഹൈക്കോടതി നേരത്തെ നിരീക്ഷിച്ചിരുന്നു. എന്നാൽ തെറ്റായ ചോദ്യത്തിന്റെ പേരിൽ മാത്രം അധ്യാപകനെ സസ്പെൻഡ് ചെയ്യാനാകുമോ എന്നും സസ്പെൻഷൻ ശിക്ഷാനടപടിയാണോ എന്നും കോടതി സർക്കാരിനോട് ചോദിച്ചിരുന്നു.
‘ബ്രിട്ടീഷുകാരുടെ കയ്യിൽ നിന്ന് ഏറ്റവും കൂടുതൽ ശിക്ഷ ഏറ്റുവാങ്ങിയ സ്വാതന്ത്ര്യസമര സേനാനി ആരാണ്?’ എന്നായിരുന്നു വിവാദ ചോദ്യം. ചരിത്രപരമായ വസ്തുതകൾക്ക് നിരക്കാത്തതും തെറ്റിദ്ധാരണ പരത്തുന്നതുമാണ് ചോദ്യമെന്ന കണ്ടെത്തലിന്റെ അടിസ്ഥാനത്തിലാണ് ഗുരുപ്രസാദിനെ പൊതുവിദ്യാഭ്യാസ ഡയറക്ടർ സസ്പെൻഡ് ചെയ്തത്.
