കോയമ്പത്തൂരിൽ നിന്ന് തൃശൂരിലേക്ക് മടങ്ങുകയായിരുന്ന സ്വർണാഭരണ നിർമാതാവിന്റെ കാർ വഴിയിൽ തടഞ്ഞ് തട്ടിക്കൊണ്ടുപോയ കേസിൽ രണ്ട് പേർ അറസ്റ്റിൽ. കോട്ടയം സ്വദേശികളായ പ്രതികളെ എറണാകുളം ഏലൂരിൽ വാഹന പരിശോധനയ്ക്കിടെയാണ് പൊലീസ് പിടികൂടിയത്.
തൃശൂർ സ്വദേശിയായ സുബീഷ് കോയമ്പത്തൂരിലെ ജ്വല്ലറികൾക്ക് സ്വർണാഭരണങ്ങൾ നിർമിച്ച് നൽകുന്ന ആളാണ്. ജൂലൈ 23-ന് ആലത്തൂർ ഇരട്ടക്കുളം സിഗ്നലിന് സമീപത്ത് രണ്ട് കാറുകളിലായി എത്തിയ സംഘം സുബീഷിനെ പിന്തുടർന്ന് വാഹനം തടയാൻ ശ്രമിച്ചു. ഭയന്ന് സുബീഷ് കാർ റോഡരികിൽ ഉപേക്ഷിച്ച് ഓടി രക്ഷപ്പെട്ടതോടെ പ്രതികൾ കാർ തട്ടിക്കൊണ്ടുപോയി.
കാറിൽ സ്വർണവും പണവും ഉണ്ടെന്ന ധാരണയിലായിരുന്നു വാഹനം അപഹരിച്ചതെന്ന് പൊലീസ് അറിയിച്ചു. പിന്നീട് ഏലൂരിൽ വാഹന പരിശോധനയ്ക്കിടെ മദ്യപിച്ച് വാഹനം ഓടിച്ചതിന് പിടിയിലായവരെ ചോദ്യം ചെയ്തപ്പോഴാണ് കാർ തട്ടിക്കൊണ്ടുപോയ കേസിലെ പ്രതികളാണെന്ന് വ്യക്തമായത്.പ്രതികൾ നൽകിയ വിവരത്തിന്റെ അടിസ്ഥാനത്തിൽ ഒറ്റപ്പാലം മായന്നൂർ കൊണ്ടാഴി ഭാഗത്ത് നിന്ന് സുബീഷിന്റെ കാർ പൊലീസ് കണ്ടെടുത്തു. സംഭവത്തിൽ കൂടുതൽ അന്വേഷണം തുടരുകയാണ്.
