സംസ്ഥാനത്ത് ഇന്നും ശക്തമായ മഴയ്ക്ക് സാധ്യത. പതിനൊന്ന് ജില്ലകളിൽ കേന്ദ്ര കാലാവസ്ഥാ വകുപ്പ് യെല്ലോ അലേർട്ട് പ്രഖ്യാപിച്ചു. മധ്യകേരളത്തിലും വടക്കൻ കേരളത്തിലും മഴ കനക്കും. തെക്കൻ കേരളത്തിൽ ഒറ്റപ്പെട്ട നേരിയ മഴയ്ക്കാണ് സാധ്യത. മഴയ്ക്കൊപ്പം ശക്തമായ കാറ്റിനും ഇടിമിന്നലും സാധ്യതയുള്ളതിനാൽ മലയോര തീരദേശ മേഖലകളിൽ ജാഗ്രത പുലർത്തണം. കേരള കർണാടക ലക്ഷദ്വീപ് തീരങ്ങളിൽ മത്സ്യബന്ധനത്തിന് ഏർപ്പെടുത്തിയ വിലക്ക് തുടരുകയാണ്. ബംഗാൾ ഉൾക്കടലിലും , പസഫിക് സമുദ്രത്തിന് മുകളിലും രൂപപ്പെട്ട ന്യൂനമർദ്ദത്തിന്റെ സ്വാധീനമാണ് സംസ്ഥാനത്ത് മഴ തുടരാൻ കാരണം. അറബിക്കടലിൽ പുതിയ ന്യൂന മർദ്ദ പാത്തിയും രൂപപ്പെട്ടിട്ടുണ്ട്.
അതേസമയം,എറണാകുളം ജില്ലയിൽ ശക്തമായ മഴ തുടരുകയാണ് . ഇന്ന് ജില്ലയിൽ യെല്ലോ അലേർട്ടാണ് പ്രഖ്യാപിച്ചിട്ടുള്ളത് . മണിക്കൂറിൽ 30 മുതൽ 40 കി മി വരെ വേഗതയിൽ ശക്തമായ കാറ്റിനും സാധ്യതയുണ്ട്.പെട്ടെന്നുണ്ടാകുന്ന വെള്ളക്കെട്ടും മരങ്ങൾ കടപുഴകി വീഴുന്നതുപോലുള്ള അടിയന്തിര സാഹചര്യങ്ങളും ഉണ്ടാകാൻ സാധ്യതയുള്ളതിനാൽ ജാഗ്രത പാലിക്കണം എന്ന് അധികൃർ നിർദ്ദേശം നൽകി. തീരദേശ മേഖലയിലുള്ളവരും മലയോര മേഖലകളിൽ ഉള്ളവരും ജാഗ്രത പാലിക്കണമെന്നും നിർദ്ദേശം നൽകി.
