വി ഡി സതീശൻ മന്ത്രിസഭയിൽ ഇടുക്കിയിൽ നിന്ന് ഒരാൾക്കും മന്ത്രി സ്ഥാനം ലഭിച്ചില്ല. അപു ജോൺ ജോസഫ് മന്ത്രിയായേക്കുമെന്ന പ്രതീക്ഷ ശക്തമായിരുന്നെങ്കിലും, ചീഫ് വിപ്പ് സ്ഥാനമാണ് ലഭിച്ചത്. ജില്ലയിൽ നാല് മണ്ഡലങ്ങളിലും യുഡിഎഫ് വിജയിച്ചിട്ടും കോൺഗ്രസിലോ കേരള കോൺഗ്രസിലോ നിന്ന് ആരും മന്ത്രിസഭയിലെത്താത്തത് പ്രവർത്തകരിൽ അതൃപ്തിക്ക് ഇടയാക്കി.
ഉമ്മൻ ചാണ്ടി മന്ത്രിസഭയിൽ ജലവിഭവ മന്ത്രിയായിരുന്ന പി ജെ ജോസഫിന് ശേഷം യുഡിഎഫിൽ നിന്ന് ഇടുക്കിക്ക് വീണ്ടും മന്ത്രിസ്ഥാനം ലഭിക്കുമെന്ന പ്രതീക്ഷയായിരുന്നു ഉണ്ടായിരുന്നത്. എന്നാൽ അവസാന ഘട്ടത്തിൽ കേരള കോൺഗ്രസ് ഒരു മന്ത്രിസ്ഥാനം മാത്രമായി ചുരുങ്ങുകയും മോൻസ് ജോസഫിന് അവസരം ലഭിക്കുകയും ചെയ്തു.കോൺഗ്രസിൽ നിന്ന് ജില്ലയ്ക്ക് മന്ത്രിസ്ഥാനം ലഭിക്കുമെന്ന സൂചനകളും അവസാന നിമിഷം വരെ സജീവമായിരുന്നു. ഡി സി സി പ്രസിഡന്റ് സിപി മാത്യുവിന്റെ പ്രതികരണങ്ങളും പ്രതീക്ഷ ഉയർത്തിയെങ്കിലും പട്ടികയിൽ ഇടം ലഭിച്ചില്ല. അതേസമയം, ചീഫ് വിപ്പ് പദവിക്ക് കാബിനറ്റ് റാങ്ക് ലഭിക്കുന്നതിനാൽ അപു ജോൺ ജോസഫിന് സർക്കാർ തലത്തിൽ പ്രാധാന്യമുള്ള ചുമതല ലഭിക്കുമെന്നാണ് നേതാക്കളുടെ വിശദീകരണം.
