തമിഴ്നാട് നിയമസഭാ തിരഞ്ഞെടുപ്പിന് ഒരാഴ്ച മാത്രം ബാക്കിനിൽക്കെ, വമ്പൻ പ്രഖ്യാപനങ്ങളുമായി ടിവികെയുടെ പ്രകടനപത്രിക. സ്ത്രീകളുടെയും കുടുംബങ്ങളുടെയും സാമൂഹിക സുരക്ഷയ്ക്ക് മുൻതൂക്കം നൽകുന്ന പത്രികയിൽ വിപ്ലവകരമായ പല വാഗ്ദാനങ്ങളും വിജയ് മുന്നോട്ടുവെക്കുന്നു
60 വയസ്സിൽ താഴെയുള്ള വീട്ടമ്മമാർക്ക് പ്രതിമാസം 2,500 രൂപ ധനസഹായം നൽകുമെന്നതാണ് ടിവികെ പ്രകടനപത്രികയിലെ പ്രധാന വാഗ്ദാനം. നവജാതശിശുക്കൾക്ക് സ്വർണ്ണമോതിരം നല്കും. യുവതികൾക്ക് വിവാഹധനസഹായമായി എട്ട് ഗ്രാം സ്വർണം നൽകും എന്നത് ഉൾപ്പെടെയുള്ള 10 പ്രധാന വാഗ്ദാനങ്ങളാണ് വിജയ് മുന്നോട്ടുവെച്ചിരിക്കുന്നത്.
ഒരോ കുടുംബത്തിനും പ്രതിവർഷം 6 സൗജന്യ പാചകവാതക സിലിണ്ടറുകൾ നല്കും. തൊഴിലില്ലാത്ത ബിരുദധാരികൾക്ക് 4,000 രൂപ പ്രതിമാസ അലവൻസ് അനുവദിക്കും. അഞ്ച് ലക്ഷം യുവാക്കൾക്ക് സ്റ്റൈപ്പന്റോടു കൂടിയ ഇന്റേൺഷിപ്പ്, സ്റ്റാർട്ടപ്പുകൾക്ക് 5 ലക്ഷം രൂപ വരെയും പുതിയ ബിസിനസുകൾക്ക് 25 ലക്ഷം രൂപ വരെയും വായ്പ എന്നിവയും പ്രകടനപത്രികയിലുണ്ട്. കർഷകർക്കായി പ്രതിവർഷം 15,000 രൂപ സഹായധനം പ്രകടനപത്രിക വാഗ്ദാനം ചെയ്യുന്നു.
2036-ഓടെ തമിഴ്നാടിനെ 1.5 ട്രില്യൺ ഡോളർ സമ്പദ്വ്യവസ്ഥയാക്കി മാറ്റുകയാണ് ലക്ഷ്യം. ഇതിനായി പ്രത്യേക AI മന്ത്രാലയവും AI സർവ്വകലാശാലയും സ്ഥാപിക്കുമെന്നും പ്രകടനപത്രിക വാഗ്ദാനം ചെയ്യുന്നു.
