പേരിൽ ‘ചെറു’നാരങ്ങ ആണെങ്കിലും വില അത്ര ചെറുതല്ല. രണ്ടു ദിവസം കൊണ്ട് ഏതാണ്ട് അമ്പത് രൂപയാണ് ചെറുനാരങ്ങക്ക് മാർക്കറ്റിൽ കൂടിയത്. കഴിഞ്ഞ ആഴ്ച നൂറ്റിഅറുപതും നൂറ്റിഎൺപതിനുമൊക്കെ വിറ്റ ചെറുനാരങ്ങയാണ് ഇപ്പോൾ മൊത്ത വിപണിയിൽ 220ൽ എത്തിയത്. ചില്ലറ വിപണിയിലേക്കെത്തുമ്പോൾ 250-260 ആകും വില. ചുരുക്കിപ്പറഞ്ഞാൽ ഒരു ചെറുനാരങ്ങയ്ക്ക് ചുരുങ്ങിയത് പത്ത് രൂപയെങ്കിലും കൊടുക്കണം. ചൂട് ഇങ്ങനെ തുടർന്നാൽ ചെറുനാരങ്ങ വില ഇനിയും കൂടുമെന്നാണ് കച്ചവടക്കാർ പറയുന്നത്.
പല മാർക്കറ്റുകളിലും ചെറുനാരങ്ങക്ക് ക്ഷാമവും നേരിടുന്നുണ്ട്. തമിഴ്നാട് അടക്കമുള്ള
മറ്റ് സംസ്ഥാനങ്ങളിൽ നിന്നാണ് ചെറുനാരങ്ങ കേരളത്തിലെ മാർക്കറ്റുകളിലേക്ക് എത്തുന്നത്.
ചെറുനാരങ്ങ വില കുതിക്കുബോൾ നാരങ്ങാവെള്ളത്തിനും കച്ചവടക്കാർ വില കൂട്ടിയിട്ടുണ്ട്. ഒരു ഗ്ലാസ് നാരങ്ങാവെള്ളത്തിന് 25-30 ആണ് കടയിലെ വില. അസഹനീയമായ ചൂടിനെ പ്രതിരോധിക്കാൻ ഒരു ഗ്ലാസ് നാരങ്ങാവെള്ളം കുടിക്കണമെങ്കിൽ കീശ കാലിയാകുമെന്ന് ചുരുക്കം.
