പത്തനംതിട്ട ജില്ലാ സെഷൻസ് കോടതിയിലാണ് അപേക്ഷ നൽകിയത്. എഫ് ഐ ആറിൽ കൂടുതൽ വകുപ്പുകൾ ചേർത്ത് ശ്രീനാദേവിയെ അറസ്റ്റ് ചെയ്യാൻ പോലീസ് നീക്കം നടത്തുന്നതിനിടെയാണ് മുൻകൂർ ജാമ്യത്തിനുള്ള ശ്രമം. മുഖ്യമന്ത്രി കൂടി ശ്രീനാദേവിയെ തള്ളിയതോടെ നടപടികൾ വേഗത്തിലാക്കുകയാണ് പോലീസ്.
പുതിയ എഫ് ഐ ആറിൽ കണ്ടാലറിയാവുന്നവരിൽ ഒന്നാം പ്രതിയാണ് ശ്രീനാദേവി കുഞ്ഞമ്മ. കണ്ടാലറിയാവുന്ന 20 പേരിൽ യൂത്ത് കോൺഗ്രസ് നേതാക്കളായ ഫെനി നൈനാൻ, നെസ്മൽ, അബിൻ ശിവദാസ് തുടങ്ങി പത്തിലധികം പേരെ പ്രതി ചേർത്തിട്ടുണ്ട്. പ്രതി ചേർക്കപ്പെട്ടതോടെയാണ് മുൻകൂർ ജാമ്യത്തിന് ശ്രീനാ ദേവി ശ്രമമാരംഭിച്ചത്.
പോലീസ് റിപ്പോർട്ട് കോടതിയിൽ ലഭിച്ചശേഷമാകും മുൻ കൂർ ജാമ്യ അപേക്ഷ കോടതി പരിഗണിക്കുക. മർദ്ദനമേറ്റ പോലീസുകാരന്റെ പരാതിയിൽ കേസിലെ ഒന്നാം പ്രതി ഷിബു ഉണ്ണിത്താന് കോടതി നേരത്തെ മുൻകൂർ ജാമ്യം അനുവദിച്ചിരുന്നു. ജൂലൈ 11 ന് നടന്ന സംഭവത്തിന്റെ സിസിടിവി ദൃശ്യങ്ങൾ പുറത്തുവന്നതിന് പിന്നാലെയാണ് പോലീസ് കണ്ടാലറിയാവുന്ന പ്രതികൾ ആരൊക്കെയെന്ന് അന്വേഷണം ആരംഭിച്ചത്. അഞ്ചാംപ്രതി യൂത്ത് കോൺഗ്രസ് നിയോജകമണ്ഡലം പ്രസിഡന്റ് ജയേഷ് പള്ളിക്കലിന് ഇന്നലെ അടൂർ കോടതി ജാമ്യം അനുവദിച്ചിരുന്നു. നിലവിലെ വകുപ്പുകൾക്ക് പുറമെ സ്റ്റേഷനിൽ അതിക്രമിച്ചു കയറൽ വകുപ്പ് കൂടി ഉൾപ്പെടുത്തി കേസിൽ എഫ് ഐ ആർ പരിഷ്കരിച്ചിട്ടുണ്ട്.
