മസ്തിഷ്ക മരണം സംഭവിച്ച 32കാരൻ ആറു പേർക്കാണ് പുതുജീവൻ പകർന്നു നൽകുന്നത്.
കഴിഞ്ഞ ചൊവ്വാഴ്ച രാവിലെ 10 മണിയോടെ റോഡിലൂടെ നടന്നു പോകുമ്പോഴാണ് പുലിയൂർ കുറ്റിമല കിഴക്കേതിൽ വീട്ടിൽ സോനു പേരിശ്ശേരിയിൽ വെച്ച് നിലതെറ്റി റോഡിൽ വീണത്. തലയുടെ പിൻവശത്ത് മാരകമായി പരിക്കേറ്റ സോനുവിനെ ഉടൻ തന്നെ ചെങ്ങന്നൂരിലെ സ്വകാര്യ ആശുപത്രിയിൽ പ്രവേശിപ്പിച്ചു. നില വഷളായതോടെ തിരുവല്ല പുഷ്പഗിരി മെഡിക്കൽ കോളേജ് ആശുപത്രിയിലേക്ക് മാറ്റി. തുടർന്ന് തീവ്ര പരിചരണ വിഭാഗത്തിൽ ചികിത്സയിലിരിക്കെ മസ്തിഷ്ക മരണം സ്ഥിരീകരിച്ചു. ഇതോടെ ബന്ധുക്കൾ അവയവദാനത്തിനുള്ള സന്നദ്ധത അറിയിക്കുകയായിരുന്നു. നേത്ര പടലങ്ങൾ, കിഡ്നികൾ, ഹൃദയ വാൽവ് എന്നിവയാണ് ദാനം ചെയ്തത്.
കിഡ്നികളിൽ ഒന്ന് പുഷ്പഗിരി മെഡിക്കൽ കോളേജ് ആശുപത്രിയിലെ രോഗിക്കും മറ്റൊന്ന് കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലുള്ള രോഗിക്കും നൽകും. ഹൃദയ വാൽവുകൾ തിരുവനന്തപുരം ശ്രീചിത്ര ആശുപത്രിയിലേക്ക് കൊണ്ടുപോയി. നേത്രപടലങ്ങൾ ചൈതന്യ ഐ.ഹോസ്പിറ്റലിൽ നൽകി. അവയവങ്ങൾ ഉച്ചയ്ക്ക് 12 മണിയോടെ തന്നെ പോലീസ് സഹായത്തോടെ വിവിധ ആശുപത്രികളിൽ എത്തിച്ചു.
