സർക്കാരിന്റെ അമിത സമ്മർദ്ദം താങ്ങാനാവുന്നില്ലെന്ന് ചൂണ്ടിക്കാട്ടി ബോർഡിലെ രണ്ട് ഡയറക്ടർമാർ പദവി ഒഴിയാൻ സന്നദ്ധത അറിയിച്ചു.
ഹിമാചൽ പ്രദേശ് സർക്കാരിനെ ഒഴിവാക്കി സ്വകാര്യ കമ്പനിയായ GNA എനർജിയിൽ നിന്ന് വൈദ്യുതി വാങ്ങാനുള്ള സർക്കാർ നീക്കത്തിൽ കേരള സ്റ്റേറ്റ് ഇലക്ട്രിസിറ്റി ബോർഡ് വലിയ പൊട്ടിത്തെറിയിലേക്കാണ് നീങ്ങുന്നത്. KSEB ഡയറക്ടർമാർക്കിടയിൽ കടുത്ത അതൃപ്തിയാണ് പുകയുന്നത്. സർക്കാരിന്റെ ഭാഗത്തുനിന്നുള്ള അമിത സമ്മർദ്ദം താങ്ങാനാകുന്നില്ലെന്ന് വ്യക്തമാക്കി ബോർഡിലെ രണ്ട് ഡയറക്ടർമാർ സ്ഥാനമൊഴിയാൻ സന്നദ്ധത അറിയിച്ചു കഴിഞ്ഞു. നിലവിൽ ഫിനാൻസ് ഡയറക്ടർ മാത്രമാണ് KSEBയിലെ ഏക സ്ഥിരം ഡയറക്ടർ. ബാക്കി നാല് പേരും ചീഫ് എൻജിനീയർമാർക്ക് ഡയറക്ടറുടെ അധിക ചുമതല നൽകിയിട്ടുള്ളതാണ്. ഈ സാഹചര്യത്തിലാണ് ഉദ്യോഗസ്ഥർ ബോർഡ് പദവിയിൽ നിന്ന് മാറാൻ താല്പര്യം പ്രകടിപ്പിച്ചിരിക്കുന്നത്. വൈദ്യുതി വാങ്ങലുമായി ബന്ധപ്പെട്ട നീക്കങ്ങളിൽ വരും ദിവസങ്ങളിൽ കൂടുതൽ പ്രതിസന്ധി ഉടലെടുക്കുമെന്നാണ് ഡയറക്ടർമാർക്കിടയിലെ ചർച്ചകൾ സൂചിപ്പിക്കുന്നത്. നിയമപരമായ ചട്ടങ്ങൾ ലംഘിച്ച് ഉത്തരവുകളിൽ ഒപ്പിടാൻ തയ്യാറല്ലെന്ന നിലപാടിലാണ് മുതിർന്ന ഉദ്യോഗസ്ഥർ. GNA വൈദ്യുതി കരാറുമായി ബന്ധപ്പെട്ട തർക്കം സർക്കാരും KSEB ഡയറക്ടർമാരും തമ്മിലുള്ള തുറന്ന പോരിലേക്കാണ് വഴിമാറുന്നത്.
