കാക്കനാട് ബസിടിച്ച് 28 വയസ്സുകാരിയായ യുവതി മരിച്ച സംഭവത്തിലാണ് ജസ്റ്റിസ് ദേവൻ രാമചന്ദ്രന്റെ വിമർശനം. പൊലീസിനെയോ നിയമത്തെയോ ഭയമില്ലാത്ത രീതിയിലാണ് ചിലർ വാഹനമോടിക്കുന്നത്. ഒരാഴ്ചയ്ക്കകം ബസ് ഡ്രൈവിങ്ങിൽ സമ്പൂർണ നിയന്ത്രണം ഉറപ്പാക്കണമെന്നും ഹൈക്കോടതിയുടെ നിർദേശം.
റോഡിന്റെ അധിപന്മാരെപ്പോലെയാണ് ചില ബസ് ഡ്രൈവർമാരുടെ പെരുമാറ്റം. ഭ്രാന്തന്മാരെ പോലെയാണ് ചില ഡ്രൈവർമാരുടെ റോഡിലെ അഭ്യാസം. സമയക്രമവും ലാഭവും പറഞ്ഞ് ഇങ്ങനെയുള്ള അപകടകരമായ ഡ്രൈവിങ്ങിനെ ന്യായീകരിക്കാനാകില്ല. ജനങ്ങളുടെ സുരക്ഷ ഉറപ്പാക്കുകയാണ് പൊലീസിന്റെ ഉത്തരവാദിത്തം. റോഡ് ഉപയോഗിക്കാൻ കാൽനടയാത്രക്കാർക്കും അവകാശമുണ്ടെന്നും കോടതി ഓർമിപ്പിച്ചു. നടപ്പാതകൾ ശരിയാക്കിയില്ലെങ്കിൽ കോടതി കയറേണ്ടി വരുമെന്ന് കൊച്ചി കോർപ്പറേഷൻ സെക്രട്ടറിക്കും കോടതിയുടെ മുന്നറിയിപ്പ്.
ഡ്രൈവർമാരുടെയും ജീവനക്കാരുടെയും ക്രിമിനൽ പശ്ചാത്തലം പരിശോധിക്കുന്നതിലെ വീഴ്ചയിലും കോടതി അതൃപ്തി രേഖപ്പെടുത്തി. എല്ലാ ഡ്രൈവർമാരെയും ഒരാഴ്ചയ്ക്കകം QR കോഡ് സ്മാർട്ട് ഐഡി സംവിധാനത്തിന് കീഴിൽ കൊണ്ടുവരണം. ബസുകളുടെ പിൻഭാഗത്ത് പരാതി അറിയിക്കാനുള്ള നമ്പർ നിർബന്ധമായും പ്രദർശിപ്പിക്കണം.
നിർദേശങ്ങൾ പാലിക്കാത്ത ബസുകളുടെ പെർമിറ്റ് റദ്ദാക്കാൻ മോട്ടോർ വാഹന വകുപ്പിന് ശുപാർശ നൽകാമെന്ന പൊലീസിന്റെ നിർദേശത്തെയും കോടതി പിന്തുണച്ചു. നിയമനടപടികൾ സ്വീകരിക്കാൻ പൊലീസ് മടിക്കരുതെന്നും വ്യക്തമാക്കി. ഒരാഴ്ചയ്ക്കകം ബസ് ഡ്രൈവിങ്ങിൽ സമ്പൂർണ നിയന്ത്രണം വേണം. അതിനിടെ മറ്റൊരു അപകടം ഉണ്ടാകാതിരിക്കട്ടെയെന്ന പ്രത്യാശയും കോടതി പങ്കുവെച്ചു.
