പതിനേഴുകാരന്റെ ജാമ്യം റദ്ദാക്കാൻ പൊലീസ് അപേക്ഷ നൽകി. എഫ്ഐആർ റജിസ്ട്രർ ചെയ്തതിലടക്കം വീഴ്ച വരുത്തിയ പൊലീസുകാർക്കെതിരെയും ചട്ടങ്ങൾമറികടന്ന് ഇടപെട്ട ജഡ്ജിനെതിരെയും ഇന്ന് നടപടിയുണ്ടാകും.
ചേരാനല്ലൂർ പൊലീസിന്റെ വീഴ്ച ബോധ്യപ്പെട്ടതോടെയാണ് അന്വേഷണം ജില്ലാ ക്രൈംബ്രാഞ്ചിനെ ഏൽപ്പിച്ചത്. ഇന്നലെ തന്നെ അന്വേഷണം ഏറ്റെടുത്ത ക്രൈംബ്രാഞ്ച് സംഘം പതിനേഴുകാരന്റെയും അമ്മയുടെയും മൊഴി രേഖപ്പെടുത്തി. വാഹനയുടമയായ ജഡ്ജിനെ ചോദ്യം ചെയ്യാൻ ഹൈക്കോടതിയിൽ അപേക്ഷ നൽകി. തുടർച്ചയായ നിയമലംഘനങ്ങൾ ചൂണ്ടിക്കാട്ടി പതിനേഴുകാരന്റെ ജാമ്യം റദ്ദാക്കാനാണ് നീക്കം.
ലൈസൻസില്ലാതെ തുടർച്ചയായി വാഹനമോടിച്ചതിന്റെ തെളിവുകൾ സഹിതമാണ് പോലീസിന്റെ അപേക്ഷ. ചേരാനല്ലൂർ പൊലീസിന്റെ വീഴ്ച പരിശോധിക്കാൻ എഡിജിപി പി. വിജയൻ തന്നെ നേരിട്ടെത്തി. എസ്എച്ച്ഒ അടക്കമുള്ളവർക്ക് വീഴ്ച സംഭവിച്ചുവെന്നാണ് വിലയിരുത്തൽ. പൊലീസിന്റെ വീഴ്ച പരിശോധിക്കാൻ പ്രത്യേക സംഘത്തെ നിയോഗിക്കും.
അപകടത്തിലെ അന്വേഷണത്തിൽ ഇടപെടൽ നടത്തിയ ജഡ്ജിന് വീഴ്ചപറ്റിയെന്നാണ് കണ്ടെത്തൽ. ജഡ്ജ് ചട്ടങ്ങൾ മറികടന്ന് ഇടപെട്ടുവെന്ന് കണ്ടെത്തി. സ്റ്റേഷനിൽ നേരിട്ടെത്തിയതടക്കം കുറ്റകരമെന്നും ജുഡീഷ്യറിക്ക് അവമതിപ്പുണ്ടാക്കിയെന്നും ഹൈക്കോടതി നിരീക്ഷണം. വീഴ്ചകൾ ചൂണ്ടിക്കാട്ടിയുള്ള റിപ്പോർട്ട് ജില്ലാ ചുമതലയുള്ള ജസ്റ്റിസ് രജിസ്ട്രിക്ക് കൈമാറി. പോലീസ് സ്റ്റേഷനിൽ പോകുന്നതിന് മുൻപ് പ്രിൻസിപ്പൽ സെഷൻസ് ജഡ്ജിയുടെ അനുമതിയും തേടിയിരുന്നില്ല. ചീഫ് ജസ്റ്റിസ്, മുതിർന്ന നാല് ജഡ്ജിമാർ എന്നിവരടങ്ങിയ സമിതി നടപടി നിശ്ചയിക്കും.
