മുൻ മുഖ്യമന്ത്രി ഉമ്മൻചാണ്ടിയുടെ മൂന്നാം ചരമവാർഷിക ദിനത്തിൽ പുതുപ്പള്ളിയിൽ വികാരനിർഭരമായ അനുസ്മരണച്ചടങ്ങുകൾ നടന്നു.മുഖ്യമന്ത്രി വി.ഡി. സതീശൻ കല്ലറയിലെത്തി പുഷ്പാർച്ചന നടത്തി ആദരാഞ്ജലി അർപ്പിച്ചു.അനുസ്മരണ സമ്മേളനം എഐസിസി ജനറൽ സെക്രട്ടറി കെ.സി. വേണുഗോപാൽ ഉദ്ഘാടനം ചെയ്തു. സംസ്ഥാനത്ത് യുഡിഎഫ് നേടിയ മിന്നുന്ന വിജയത്തിന് പിന്നിൽ ഉമ്മൻചാണ്ടിയുടെ ജനപ്രീതിയും രാഷ്ട്രീയ പാരമ്പര്യവും നിർണായക ഘടകമായിരുന്നുവെന്ന് കെ സി വേണുഗോപാൽ പറഞ്ഞു.
പിതാവിന്റെ അനുസ്മരണ ദിനം വിവാദങ്ങളുടെ വേദിയാക്കരുതെന്ന് ചാണ്ടി ഉമ്മൻ എംഎൽഎ പ്രസംഗത്തിൽ അഭ്യർഥിച്ചു. കെഎസ്‌യു പ്രവർത്തകരായിരുന്ന തങ്ങളെ രാഷ്ട്രീയത്തിലേക്ക് കൈപിടിച്ചുയർത്തിയത് ഉമ്മൻചാണ്ടിയാണെന്ന് പി.സി. വിഷ്ണുനാഥ് പറഞ്ഞു. ഉമ്മൻചാണ്ടിയെ പോലൊരു ജനകീയ നേതാവാകാൻ മറ്റാർക്കും കഴിയില്ലെന്ന് ഷാഫി പറമ്പിലും അനുസ്മരിച്ചു.ഉമ്മൻചാണ്ടിയുടെ ഓർമ്മദിനത്തിൽ സംസ്ഥാനത്തിന്റെ വിവിധ ഭാഗങ്ങളിൽ നിന്ന് നൂറുകണക്കിന് കോൺഗ്രസ് പ്രവർത്തകരും അനുഭാവികളും പുതുപ്പള്ളിയിലെ കല്ലറയിലെത്തി ആദരാഞ്ജലി അർപ്പിച്ചു.
അനുസ്മരണ പരിപാടികളുടെ ഭാഗമായി മണ്ഡലത്തിലെ 114 സ്കൂളുകൾക്ക് സൈക്കിളുകൾ, വിദ്യാർത്ഥികൾക്ക് സ്കോളർഷിപ്പുകൾ, ഭിന്നശേഷിക്കാർക്ക് സ്കൂട്ടറുകൾ എന്നിവ വിതരണം ചെയ്തു. ജനസേവനത്തിന് ജീവിതം സമർപ്പിച്ച നേതാവിന്റെ ഓർമ്മ പ്രവർത്തനങ്ങളിലൂടെ നിലനിർത്തുകയെന്ന സന്ദേശത്തോടെയായിരുന്നു ചടങ്ങുകൾ.
