കോട്ടയം മെഡിക്കൽ കോളേജ് ആശുപത്രിയിൽ ചികിത്സയിലിരിക്കെ യുവതി മരിച്ച സംഭവത്തിൽ ഗുരുതര ആരോപണവുമായി കുടുംബം. ശസ്തക്രിയക്ക് ശേഷം ഹസീനക്ക് രക്തസ്രാവം ഉണ്ടായിട്ട് കെട്ടി വെക്കാൻ പോലും നഴ്സുമാരും ഡോക്ടർമാരും തയ്യാറായില്ലെന്ന് കുടുംബം. കുറ്റക്കാരായ ജീവനക്കാരെ സർവീസിൽനിന്ന് പിരിച്ചുവിടണമെന്നും കുടുംബം ആവശ്യപ്പെട്ടു. സംഭവത്തിൽ ചികിത്സ പിഴവ് ഉണ്ടായെന്ന് മന്ത്രി കെ മുരളീധരൻ ഇന്നലെ സമ്മതിച്ചിരുന്നു.
ഈ മാസം ഒന്നിനാണ് ഹസീന മരണപ്പെട്ടത്. കോട്ടയം മെഡിക്കൽ കോളജിൽ വെച്ച് ഹെർണിയ ശസ്തക്രിയ കഴിഞ്ഞ് വീട്ടിലേക്ക് മടക്കിയ യുവതി പിന്നീട് നിലവഷളായി മരണപ്പെടുകയായിരുന്നു. ആശുപത്രിക്കെതിരേ നേരത്തെ തന്നെ പരാതിപ്പെട്ട കുടുംബം ഗുരുതര ആരോപണം തുടർന്നു. ശക്തമായ പനി ഉണ്ടായിട്ടും ഡിസ്ചാർജ് ചെയ്തു. രക്തസ്രവം ഉണ്ടായിട്ട് കെട്ടിവയ്ക്കാൻ പോലും തയ്യാറായില്ല. പരിചരിച്ചത് പൂർണമായി ജൂനിയർ ഡോക്ടർമാർ.
തങ്ങൾക്കുണ്ടായ ദുരനുഭവം ഇനിയൊരു കുടുംബത്തിനും ഉണ്ടാകരുതെന്നും ഹസീനയുടെ ബന്ധുക്കൾ. വീഴ്ച്ചയുണ്ടായെന്ന് മന്ത്രി സമ്മതിച്ചാൽ മാത്രം പോരാ, ആരോപണവിധേയരെ സർവീസിൽ നിന്ന് പിരിച്ചു വിടണമെന്നും ആവശ്യപ്പെട്ടു.
രണ്ട് കുട്ടികളടങ്ങുന്ന കുടുംബത്തിന്റെ സംരക്ഷണം സർക്കാർ ഏറ്റെടുക്കണമെന്നും കുടുംബം ആവശ്യപ്പെടുന്നുണ്ട്. കുടുംബത്തിന്റെ പരാതിയിൽ ആരോഗ്യവകുപ്പ് ഡയറക്ടർ നിയോഗിച്ച അന്വേഷണസംഘത്തിന്റെ റിപ്പോർട്ടിൽ ചികിത്സയിൽ വീഴ്ച സംഭവിച്ചതായി കണ്ടെത്തിയിരുന്നു. കോട്ടയത്ത്‌ നടന്ന ചടങ്ങിൽ മന്ത്രി പരസ്യമായി സമ്മതിക്കുകയും ചെയ്തു. അന്വേഷണ റിപ്പോർട്ടിന്റെ അടിസ്ഥാനത്തിൽ കുറ്റക്കാർക്കെതിരെ നടപടി ഉണ്ടാകുമെന്ന പ്രതീക്ഷയിലാണ് ഹസീനയുടെ കുടുംബം.
