കൈക്കൂലി കള്ളപ്പണമിടപാട് കേസില്‍ മുന്‍ മുഖ്യമന്ത്രി പിണറായി വിജയനെതിരായ വിജിലന്‍സ് അന്വേഷണം സുപ്രീംകോടതി തടഞ്ഞതോടെ കരുതലോടെ നീങ്ങാന്‍ ഇഡി. പിണറായി വിജയനെ ചോദ്യംചെയ്യുന്നതിലടക്കം നിയമവശങ്ങള്‍ പരിശോധിച്ച ശേഷമാകും ഇനി ഇഡിയുടെ തീരുമാനം. പിണറായി ചോദ്യം ചെയ്യുന്നതിന് മുന്നോടിയായി കൊച്ചിയിലെത്തിയ സ്‌പെഷ്യല്‍ ഡയറക്ടര്‍ ഇഡി അഭിഭാഷകരുമായും കൂടിക്കാഴ്ച നടത്തും.
കൈക്കൂലി, കള്ളപ്പണമിടപാട് കേസില്‍ വെള്ളിയാഴ്ചയാണ് പിണറായി വിജയന് ഇഡിക്ക് മുന്‍പാകെ ചോദ്യം ചെയ്യലിന് ഹാജരാകേണ്ടത്. വിജിലന്‍സ് അന്വേഷണത്തിന്റെ ചുവടുപിടിച്ചായിരുന്നു ഇഡി കേസെടുത്തതും സമന്‍സയച്ചതും. പിണറായി വിജയന്റെ ഹര്‍ജിയില്‍ വിജിലന്‍സിന്റെ അന്വേഷണം തന്നെ സുപ്രീംകോടതി തടഞ്ഞു. ഇതോടെ ഇഡി അന്വേഷണവും പ്രതിസന്ധിയിലായി. വിജിലന്‍സ് അന്വേഷണം തടഞ്ഞ സുപ്രീംകോടതി തീരുമാനം ഇഡി കേസിനും ബാധകമാകുമോ എന്ന കാര്യത്തില്‍ വ്യക്തത വന്നിട്ടില്ല. അതിനാല്‍ തിടുക്കപ്പെട്ട് തുടര്‍ നടപടികള്‍ വേണ്ട എന്ന തീരുമാനത്തിലാണ് ഇഡി. സുപ്രീംകോടതി തീരുമാനം വരുമ്പോള്‍ ഇഡി സ്‌പേഷ്യല്‍ ഡയറക്ടര്‍ ഉള്‍പ്പെടെയുള്ള ഉന്നത ഉദ്യോഗസ്ഥര്‍ കൊച്ചി ഓഫിസിലുണ്ടോയിരുന്നു. കേസില്‍ തുടര്‍ നീക്കങ്ങള്‍ സംബന്ധിച്ച കൂടിയാലോചനകള്‍ തുടരവെയായിരുന്നു സുപ്രീംകോടതി ഇടപെടല്‍. വെള്ളിയാഴ്ച പിണറായി ചോദ്യം ചെയ്യലിന് ഹാജരാകില്ല. നിയമസഭ സമ്മേളനം ചൂണ്ടിക്കാട്ടി സാവകാശം തേടാനായിരുന്നു തീരുമാനമെങ്കിലും നിലവില്‍ ഇളവിനായി സുപ്രീംകോടതി തീരുമാനവും ഉന്നയിക്കും. വീണ്ടും സമന്‍സയക്കുന്നതിലടക്കം തീരുമാനം നിയമോപദേശത്തിന്റെ അടിസ്ഥാനത്തിലാകും.
ഇഡി ഉദ്യോഗസ്ഥര്‍ ഒരുദിവസം കൂടി കൊച്ചിയില്‍ തുടരും. പിണറായിക്കെതിരായ പുതിയ കേസിന് പുറമെ മുഹമ്മദ് റിയാസ് പ്രതിയായ കേസിന്റെ തുടര്‍ നടപടികളും ഉദ്യോഗസ്ഥര്‍ ചര്‍ച്ച ചെയ്തു. ഈ രണ്ട് കേസുകള്‍ക്ക് അടിസ്ഥാനമായ സിഎംആര്‍എല്‍ എക്സാലോജിക് കേസിന്റെ അന്വേഷണ പുരരോഗതിയും ഉദ്യോഗസ്ഥര്‍ വിലയിരുത്തി. ആദ്യ കുറ്റപത്രം സമര്‍പ്പിച്ച ശേഷം സിഎംആര്‍എലില്‍ നിന്ന പണം കൈപ്പറ്റിയവരിലേക്ക് അന്വേഷണം നീട്ടാനാണ് നിര്‍ദേശം.
