അന്നത്തെ വൈസ് പ്രസിഡൻറായിരുന്ന സിപിഎം നേതാവ് ബിനോയ് കുര്യന് പണം നൽകാൻ ദിവ്യ പറഞ്ഞെന്ന രീതിയിലുള്ള കാർട്ടൺ ഇന്ത്യ കമ്പനി എംഡി മുഹമ്മദ് ആസിഫിൻറെ ശബ്ദ സന്ദേശവും വാട്സ് ആപ്പ് ചാറ്റും ഷമ്മാസ് പുറത്തുവിട്ടു. അഴിമതി നടത്തിയിട്ടില്ലെന്നും അനധികൃതമായി പണം വാങ്ങിയിട്ടില്ലെന്നും ബിനോയ് കുര്യൻ.
പി.പി. ദിവ്യ ജില്ലാ പഞ്ചായത്ത് പ്രസിഡൻറായിരുന്നപ്പോൾ ബിനോയ് കുര്യൻ ആയിരുന്നു വൈസ് പ്രസിഡൻറ്. ബജറ്റ് അവതരണ സമയത്ത് കോംപ്ലിമെൻററിബാഗ് വാങ്ങാൻ ബിനോയ് കുര്യൻ പണം ആവശ്യപ്പെട്ടെന്നും വലിയ തുക കൊടുക്കാൻ പി.പി. ദിവ്യ പറഞ്ഞെന്നും കാർട്ടൺ ഇന്ത്യ എംഡി മുഹമ്മദ് ആസിഫ് പറയുന്നതായുള്ള ശബ്ദരേഖയാണ് മുഹമ്മദ് ഷമ്മാസ് പുറത്തുവിട്ടത്. ആസിഫ് പൈസ തരും, വൈസിന് കൊടുത്തോ എന്ന് ദിവ്യയുടെ നമ്പറിൽ നിന്ന് അയച്ചതെന്ന തരത്തിലുള്ള വാട്സ് ആപ്പ് ചാറ്റിൻറെ സ്ക്രീൻ ഷോട്ടും ഷമ്മാസ് പുറത്തുവിട്ടു. പി.പി ദിവ്യയും ബെനാമി കമ്പനി എന്ന ആരോപണം നേരിടുന്ന കാർട്ടൺ ഇന്ത്യയും തമ്മിലുള്ള ബന്ധത്തിന് തെളിവാണിതെന്ന് മുഹമ്മദ് ഷമ്മാസ്. പണം വാങ്ങിയെന്ന ആരോപണം ജില്ലാ പഞ്ചായത്തിൻറെ നിലവിലെ പ്രസിഡൻറ് കൂടിയായ ബിനോയ്കുര്യൻ നിഷേധിച്ചു. ബജറ്റ് അവതരണ വേളയിൽ സമ്മാനങ്ങൾ വാങ്ങാൻ സ്പോൺസർഷിപ്പ് പണം പലരിൽ നിന്നും തേടിയിട്ടുണ്ടെന്നു അതൊന്നും തൻറെ കയ്യിലേക്ക് അല്ല വന്നതെന്നും ബിനോയ് കുര്യൻ പ്രതികരിച്ചു. ദിവ്യക്കെതിരായ പരാതി പിൻവലിക്കാൻ താൻ പണം ആവശ്യപ്പെട്ടിട്ടില്ല. അത്തരമൊരു ആരോപണം ഉന്നയിച്ച കാർട്ടൺ ഇന്ത്യ എംഡി മുഹമ്മദ് ആസിഫിനെതിരെ മാനനഷ്ടത്തിന് കേസ് കൊടുക്കുമെന്നും ഷമ്മാസ് പറയുന്നു.
