ബാംഗ്ലൂരിൽ മലയാളി യുവാവിനെ പെൺ സുഹൃത്തിന്റെ അച്ഛൻ മർദ്ദിച്ചു കൊലപ്പെടുത്തിയ സംഭവത്തിൽ പ്രതിക്ക് പരമാവധി ശിക്ഷ ഉറപ്പാക്കണമെന്ന് കൊല്ലപ്പെട്ട കിരണിന്റെ കുടുംബം. സാമ്പത്തികമായി പ്രതിക്കും കുടുംബത്തിനും ഉള്ള വലിയ സ്വാധീനം കൊണ്ട് കേസ് അട്ടി മറിക്കുമോ എന്ന ഭയം ഉണ്ടെന്നും കുടുംബം പറഞ്ഞു. പോസ്റ്റ്മാർട്ടത്തിനു ശേഷം കിരണിന്റെ മൃതദേഹം ഇന്ന് ബന്ധുക്കൾക്ക് വിട്ടു നൽകും.
ചൊവ്വാഴ്ച രാത്രിയാണ് ബാംഗ്ലൂർ യലഹങ്കയിൽ ക്രൂരമർദ്ദനത്തെ തുടർന്ന് പട്ടാമ്പി തിരുവേഗപ്പുറ സ്വദേശി കിരൺ കൊല്ലപ്പെടുന്നത്. സ്വീറ്റ് കോൺ നിർമ്മാണ കമ്പനി ഉടമ ആനന്ദിന്റെ കമ്പനിയിലെ ജീവനക്കാരനായിരുന്നു കിരൺ. ഇതിനിടെ ആനന്ദിന്റെ മകളുമായി പ്രണയത്തിലായി. ചില പ്രശ്നങ്ങളെ തുടർന്ന് ജോലി ഉപേക്ഷിച്ചെങ്കിലും പെൺ സുഹൃത്തുമായി ബന്ധം ഉണ്ടായിരുന്നു. തമിഴ്നാട് സ്വദേശികളായ ആനന്ദും ഭാര്യയും നാട്ടിലേക്ക് എന്നുപറഞ്ഞ് യാത്ര തിരിച്ചെങ്കിലും അപ്രതീക്ഷിതമായി വീട്ടിൽ തിരിച്ചെത്തിയതോടെ ആണ് കിരണിനെ മകളോടൊപ്പം വീട്ടിൽ കണ്ടത്. ഇതാണ് പ്രകോപന കാരണം. തുടർന്ന് അതിക്രൂരമായി പ്രതി കിരണിനനെ മർദിച്ചു. അടിവയറ്റിലും തലക്കും ഉൾപ്പടെ ക്രൂര മർദനം ഏറ്റുവാങ്ങിയ കിരൺ ആശുപത്രിയിലെത്തിയെങ്കിലും മരണം സ്ഥിരീകരിക്കുകയായിരുന്നു. ആശുപത്രി അധികൃതരാണ് പോലീസിൽ വിവരം അറിയിക്കുന്നത്. തുടർന്ന് പൊലീസ് നടത്തിയ അന്വേഷണത്തിന് പിന്നാലെ ആനന്ദിനെ ഇന്നലെ അറസ്റ്റ് ചെയ്തു. എന്നാൽ കിരൺ കൊല്ലപ്പെട്ട ദിവസം പെൺ സുഹൃത്ത് തങ്ങളെ ബന്ധപ്പെട്ടിരുന്നെന്നും പ്രതിക്ക് പരമാവധി ശിക്ഷ ഉറപ്പാക്കണം എന്നും കിരണിന്റെ കുടുംബം ആവശ്യപ്പെട്ടു.
ബാംഗ്ലൂരിലെ സർക്കാർ ആശുപത്രിയിൽ പോസ്റ്റ്മോർട്ടത്തിനുശേഷം മൃതദേഹം ഇന്ന് ബന്ധുക്കൾക്ക് വിട്ടു നൽകും. പരമാവധി ശിക്ഷ ഉറപ്പാക്കാൻ നിയമപരമായി ഏതറ്റം വരെയും മുന്നോട്ടു പോകുമെന്നും കുടുംബം പറഞ്ഞു.
