ഓപ്പറേഷൻ ‘തൂഫാൻ’ വഴി മയക്കുമരുന്നിനും കുറ്റകൃത്യങ്ങൾക്കുമെതിരെ വ്യാപക പരിശോധനയും അറസ്റ്റും നടത്തി ശ്രദ്ധ നേടിയ പത്തനംതിട്ട പോലീസിന് നാണക്കേടായി ഡാൻസാഫ് സംഘത്തിലെ മൂന്ന് ഉദ്യോഗസ്ഥരുടെ മദ്യപിച്ച് വാഹനമോടിച്ച സംഭവം. കേസിൽ മൂന്ന് സിവിൽ പോലീസ് ഓഫീസർമാരെ സസ്പെൻഡ് ചെയ്തു.
സുമൻ, പ്രിയേഷ്, രാഹുൽ എന്നിവരെയാണ് ജില്ലാ പോലീസ് മേധാവി സസ്പെൻഡ് ചെയ്തത്. ഇവർ സഞ്ചരിച്ച പോലീസ് ജീപ്പ് ചൊവ്വാഴ്ച വൈകിട്ട് പത്തനംതിട്ട മേലെ വെട്ടിപ്പുറത്ത് നിയന്ത്രണം വിട്ടു. അപകടത്തിൽ നിന്ന് വനിത ഓട്ടോ ഡ്രൈവർ തലനാരിഴയ്ക്കാണ് രക്ഷപ്പെട്ടത്.ഇന്നലെ വൈകിട്ട് ആറുമണിയോടെ ആയിരുന്നു സംഭവം.ഇതോടെ നാട്ടുകാർ പോലീസ് ഉദ്യോഗസ്ഥരെ തടഞ്ഞുവച്ചശേഷം പത്തനംതിട്ട പോലീസിനെ വിവരം അറിയിക്കുകയായിരുന്നു.
നാട്ടുകാർ ജീപ്പ് തടഞ്ഞപ്പോൾ ഒരു പോലീസ് ഉദ്യോഗസ്ഥൻ വാഹനത്തിൽ നിന്ന് ഇറങ്ങി ഓടി. തുടർന്ന് സ്ഥലത്തെത്തിയ പോലീസ് മദ്യപിച്ച ഉദ്യോഗസ്ഥരെയും വാഹനവും കസ്റ്റഡിയിലെടുത്തു. വാഹനം ഓടിച്ച പ്രിയേഷ് ഉൾപ്പെടെ മൂന്നുപേരും മദ്യപിച്ചതായി വൈദ്യ പരിശോധനയിൽ കണ്ടെത്തി. ജില്ലാ പോലീസ് മേധാവിയുടെ നിർദ്ദേശപ്രകാരം മൂന്ന് പേർക്കും സസ്പെൻഷൻ നൽകി. സംഭവം ഗൗരവത്തോടെ കണ്ട് അടിയന്തര നടപടി സ്വീകരിക്കാൻ ഇന്നലെ രാത്രി തന്നെ ജില്ലാ പോലീസ് മേധാവി ആർ ആനന്ദ് നിർദ്ദേശം നൽകിയിരുന്നു. ഇവർക്കെതിരെ ആഭ്യന്തര അന്വേഷണത്തിനും ജില്ലാ പോലീസ് മേധാവി ഉത്തരവിട്ടു.
