എഡിജിപി എം ആർ അജിത്കുമാറിനെ ബീവറേജസ് കോർപ്പറേഷൻ എംഡി സ്ഥാനത്തുനിന്ന് ഒഴിവാക്കണമെന്ന് എക്സൈസ് മന്ത്രി എം ലിജു. മുഖ്യമന്ത്രിയോടാണ് ഇക്കാര്യം ആവശ്യപ്പെട്ടത്. നിലവിലെ സർക്കാർ നയങ്ങളോട് യോജിക്കുന്ന ഉദ്യോഗസ്ഥരെ സ്ഥാപനത്തിൽ നിയമിക്കണമെന്നും മന്ത്രി എം ലിജു ആവശ്യപ്പെട്ടു.
ക്രമസമാധാന ചുമതലയിൽ നിന്ന് നീക്കം ചെയ്ത ശേഷമായിരുന്നു എഡിജിപി എം ആർ അജിത്കുമാറിനെ ബീവറേജസ് കോർപ്പറേഷൻ എംഡി ആയി നിയമിച്ചത്. നിലവിൽ സ്ഥാനത്ത് തുടരുന്ന എം ആർ അജിത്കുമാറിനെ സ്ഥാപനത്തിൽ നിന്ന് നീക്കം ചെയ്യണമെന്നാണ് വകുപ്പ് മന്ത്രി മുഖ്യമന്ത്രിയോട് ആവശ്യപ്പെട്ടത്. നിലവിലെ സാഹചര്യത്തിൽ സർക്കാർ നയം നടപ്പിലാക്കാൻ പറ്റുന്ന ഉദ്യോഗസ്ഥനെ വകുപ്പിൽ വേണമെന്നാണ് മന്ത്രിയുടെ ആവശ്യം. ആലപ്പുഴയിൽ യൂത്ത് കോൺഗ്രസ് നേതാക്കളെ ഗൺമാൻ മർദിച്ച കേസിൽ എം ആർ കുമാറിന്റെ പങ്ക് പുറത്തുവന്നിരുന്നു. ഇതും വകുപ്പിൽ നിന്ന് നീക്കം ചെയ്യണമെന്ന ആവശ്യം വേഗത്തിലാക്കാൻ ഇടയാക്കിയിട്ടുണ്ട്. മന്ത്രിയുടെ ആവശ്യത്തിൽ ഉടൻ തീരുമാനം ഉണ്ടാകുമെന്നാണ് സൂചന.
