വേനലവധിക്ക് ശേഷം കുട്ടികൾ നാളെ സ്കൂളുകളിലേക്ക്. നവാഗതരെ വരവേൽക്കാൻ എല്ലാ വിദ്യാലയങ്ങളും ഒരുങ്ങിക്കഴിഞ്ഞു. സംസ്ഥാനതല പ്രവേശനോത്സവം തിരുവനന്തപുരം പട്ടം ഗവ.മോഡൽ ഗേൾസ് ഹയർ സെക്കൻഡറി സ്കൂളിൽ മുഖ്യമന്ത്രി വി ഡി സതീശൻ ഉദ്ഘാടനം ചെയ്യും.
പുത്തൻ ബാഗും കുടകളും പുസ്തകങ്ങളുമൊക്കെയായി കുഞ്ഞുമക്കൾ നാളെ വിദ്യാലയങ്ങളിലേക്ക് എത്തും. പുതിയ അധ്യയനവർഷത്തെ വരവേൽക്കാനായി വിപുലമായ ഒരുക്കങ്ങളാണ് സ്കൂളുകളിൽ നടത്തിയിട്ടുള്ളത്. നവാഗതരെ സ്വീകരിക്കാനായി തോരണവും ബലൂണും കൊണ്ട് സ്കൂളുകൾ അലങ്കരിച്ചുകഴിഞ്ഞു.
സംസ്ഥാനതല പ്രവേശനോത്സവം തിരുവനന്തപുരം പട്ടം ഗവ.മോഡൽ ഗേൾസ് ഹയർ സെക്കൻഡറി സ്കൂളിൽ രാവിലെ 10 മണിക്ക് മുഖ്യമന്ത്രി വി ഡി സതീശൻ ഉദ്ഘാടനം ചെയ്യും. വിദ്യാഭ്യാസ മന്ത്രി അധ്യക്ഷനാകുന്ന ചടങ്ങിൽ ആയിരം പേർക്ക് ഇരിക്കാൻ കഴിയുന്ന തരത്തിലാണ് പന്തൽ ക്രമീകരിച്ചിരിക്കുന്നത്. പ്രൈമറി ക്ലാസുകളിൽ കുട്ടികൾക്കായി പ്രത്യേകം ഒരുക്കങ്ങളുമുണ്ട്. മുഴുവൻ കുട്ടികൾക്കും മധുരവും മിൽക്ക്ഷേക്കും നൽകി സ്വീകരിക്കും.
ഭരണമാറ്റത്തിന്റെ പുതുമ അധ്യയനവർഷാരംഭത്തിലും പ്രതിഫലിക്കും. നെടുനീളൻ പ്രസംഗങ്ങൾക്ക് പകരം കുട്ടികളുമായി സംവദിക്കുന്ന അവതരണ പരിപാടികൾ നിർബന്ധമാക്കി. സ്കൂളിന് പുറത്തുള്ള ഘോഷയാത്രകൾ വിലക്കിയിട്ടുണ്ട്. വിദ്യാർഥികളും രക്ഷിതാക്കളും അധ്യാപകരും ചേർന്ന് സൈബർ സുരക്ഷാ പ്രതിജ്ഞയെടുക്കും. പഠനസമയം ഉറപ്പാക്കാൻ വിദ്യാഭ്യാസ കലണ്ടറും തയ്യാറായിട്ടുണ്ട്.
