മുഖ്യമന്ത്രി പ്രഖ്യാപനത്തിന് പിന്നാലെ വി ഡി സതീശനെ അഭിനന്ദിച്ച് മുതിർന്ന കോൺഗ്രസ് നേതാവ് എ. കെ ആന്റണി.കേരളം ഗുരുതര സാമ്പത്തിക പ്രതിസന്ധിയിലൂടെയാണ് കടന്നുപോകുന്നതെന്നും പുതിയ സർക്കാരിന് സമയം നൽകണമെന്നും അദ്ദേഹം ആവശ്യപ്പെട്ടു.2001ൽ മുഖ്യമന്ത്രിയായിരുന്ന കാലഘട്ടം ഓർമിപ്പിച്ചായിരുന്നു എ കെ ആന്റണിയുടെ പ്രതികരണം. അന്നും സമാന സാഹചര്യമായിരുന്നുവെന്നും സാമ്പത്തിക പ്രതിസന്ധിയെ മറികടക്കാൻ കടുത്ത തീരുമാനങ്ങൾ എടുക്കേണ്ടിവന്നിരുന്നുവെന്നും അദ്ദേഹം പറഞ്ഞു.
“കേരളം സാമ്പത്തികമായി തകർന്ന അവസ്ഥയിലാണ്. തുടക്കത്തിൽ തന്നെ ജനപ്രിയ പ്രഖ്യാപനങ്ങൾ പ്രതീക്ഷിക്കരുത്. വി ഡി സതീശന്റെ മനസ്സിൽ നിരവധി സ്വപ്നങ്ങൾ ഉണ്ടാകും. എന്നാൽ കുറച്ച് മുണ്ട് മുറുക്കി ഉടുക്കുകയും കയ്പ്പ് നീർ കുടിക്കയും ചെയ്യേണ്ട സാഹചര്യമാണുള്ളത്,” എന്നായിരുന്നു എ കെ ആന്റണിയുടെ വാക്കുകൾ.2001നെക്കാൾ പത്തിരട്ടി ഗുരുതരമായ സാമ്പത്തിക പ്രതിസന്ധിയാണ് ഇപ്പോൾ സംസ്ഥാനത്തുള്ളതെന്നും കേരളത്തെ കരകയറ്റാൻ സർക്കാരിന് സാവകാശം നൽകണമെന്നും അദ്ദേഹം കൂട്ടിച്ചേർത്തു.
