നീണ്ടകരയിൽ മത്സ്യബന്ധനത്തിനിടെ കാണാതായ ഗൗതം കൃഷ്ണയുടെ വീട്ടിലെത്തി മുഖ്യമന്ത്രി വി.ഡി. സതീശൻ. ഗൗതത്തിന്റെ അമ്മ രേഷ്മയെ സന്ദർശിച്ച മുഖ്യമന്ത്രി, സർക്കാർ കുടുംബത്തിനൊപ്പമുണ്ടെന്ന് ഉറപ്പ് നൽകി.മന്ത്രി ഷിബു ബേബി ജോണും മുഖ്യമന്ത്രിക്കൊപ്പമുണ്ടായിരുന്നു. പ്രതികൂലമായ സാഹചര്യങ്ങളില്‍ മാത്രമാണ് തിരച്ചില്‍ നടക്കാതിരുന്നത്. ബാക്കിയുള്ള ദിവസങ്ങളിലെല്ലാം തിരച്ചില്‍ നടന്നിരുന്നു. ഗൗതത്തിനായുള്ള തിരച്ചിലിൽ വീഴ്ച ഉണ്ടായിട്ടില്ലെന്നും തുടക്കം മുതൽ എല്ലാ സംവിധാനങ്ങളെയും ഏകോപിപ്പിച്ചാണ് പരിശോധന നടത്തിയതെന്നും മുഖ്യമന്ത്രി പറഞ്ഞു.
ആദ്യ ദിവസങ്ങളിൽ തിരച്ചിലിൽ അലംഭാവമുണ്ടായതായി അമ്മ രേഷ്മ മുഖ്യമന്ത്രിയെ അറിയിച്ചു. രക്ഷാപ്രവർത്തനങ്ങൾക്കുള്ള എസ്.ഒ.പി പരിഷ്കരിക്കുമെന്നും മത്സ്യത്തൊഴിലാളികളുടെ ഇൻഷുറൻസ് നിബന്ധനകൾ പരിഷ്കരിക്കുമെന്നും മുഖ്യമന്ത്രി വ്യക്തമാക്കി.ഫിഷറീസ്, കോസ്റ്റൽ പൊലീസ്, മറൈൻ എൻഫോഴ്‌സ്‌മെന്റ് വിഭാഗങ്ങളുടെ നേതൃത്വത്തിൽ ഗൗതം കൃഷ്ണയ്ക്കായുള്ള തിരച്ചിൽ ഇന്നും തുടരുകയാണ്.
