പിഎസ് സി റാങ്ക് പട്ടിക നിലവിലിരിക്കെ താൽക്കാലിക ഹെൽത്ത് ഇൻസ്പെക്ടർമാരുടെ കരാർ നീട്ടി സർക്കാർ. പബ്ലിക് ഹെൽത്ത് ഇൻസ്പെക്ടർ ഗ്രേഡ് 2 തസ്തികയിലാണ് 505 പഞ്ചായത്തുകളിലെ താൽക്കാലിക ജീവനക്കാരുടെ കരാർ മൂന്ന് മാസത്തേക്ക് കൂടി നീട്ടിയത്. ഇതുസംബന്ധിച്ച തദ്ദേശ സ്വയംഭരണ വകുപ്പിന്റെ ഉത്തരവിന്റെ പകർപ്പ് ബിഗ് ടിവിക്ക് ലഭിച്ചു.
2022ൽ സ്പെഷ്യൽ റൂൾ പ്രകാരം 505 പഞ്ചായത്തുകളിലേക്ക് സ്ഥിരം തസ്തികയായി പബ്ലിക് ഹെൽത്ത് ഇൻസ്പെക്ടർ ഗ്രേഡ് 2 പോസ്റ്റ് നിലവിൽ വന്നിരുന്നു. ഈ തസ്തികയിലേക്ക് പിഎസ് സി പരീക്ഷ പാസായി റാങ്ക് പട്ടികയിൽ ഇടം നേടിയ ഉദ്യോഗാർത്ഥികൾ നിയമനം കാത്തിരിക്കെയാണ് താൽക്കാലിക ജീവനക്കാരുടെ കരാർ വീണ്ടും നീട്ടിയത്.
കഴിഞ്ഞ മാസം 27ന് പുറത്തിറക്കിയ ഉത്തരവ് പ്രകാരം സെപ്റ്റംബർ 30 വരെ താൽക്കാലിക ജീവനക്കാർക്ക് തുടരാം. മൂന്ന് മാസത്തിൽ കൂടുതൽ തുടരുന്ന താൽക്കാലിക തസ്തികകളിൽ പിഎസ് സി റാങ്ക് ലിസ്റ്റ് നിലവിലുണ്ടെങ്കിൽ അതിൽനിന്ന് നിയമനം നടത്തണമെന്ന സർക്കാർ ഉത്തരവ് നിലനിൽക്കെയാണ് കരാർ നീട്ടിയതെന്നാണ് ഉദ്യോഗാർത്ഥികളുടെ ആരോപണം.
