സംസ്ഥാന സർക്കാരിനെതിരെ രൂക്ഷ വിമർശനവുമായി സമസ്തയുടെ വിദ്യാർത്ഥി സംഘടന എസ്.കെ.എസ്.എസ്.എഫ്. സർക്കാരിനെ മറികടന്ന് രാജ്ഭവൻ ഭരണം നടത്തുന്ന സാഹചര്യമുണ്ടാകരുതെന്ന് സംഘടന മുന്നറിയിപ്പ് നൽകി. സംഘപരിവാർ അജണ്ടകൾക്കെതിരെ സംസ്ഥാന സർക്കാരും പൊതുസമൂഹവും ശക്തമായ ജാഗ്രത പാലിക്കണമെന്നും ആവശ്യപ്പെട്ടു.
രാജ്ഭവന്റെ ഇടപെടലുകൾ എന്ത് വിലകൊടുത്തും തടയണമെന്ന് എസ്.കെ.എസ്.എസ്.എഫ് ആവശ്യപ്പെട്ടു. സ്വാതന്ത്ര്യദിനത്തോടനുബന്ധിച്ച് വിദ്യാർത്ഥികൾക്കായി നടത്തിയ ക്വിസ് മത്സരത്തിൽ വി.ഡി. സവർക്കറെ പ്രകീർത്തിക്കുന്ന തരത്തിലുള്ള ചോദ്യങ്ങൾ ഉൾപ്പെടുത്തിയതിൽ ദുരൂഹതയുണ്ടെന്നും സംഘടന ആരോപിച്ചു.
വന്ദേമാതരം സംബന്ധിച്ച ചീഫ് സെക്രട്ടറിയുടെ ഉത്തരവിലും എസ്.കെ.എസ്.എസ്.എഫ് ആശങ്ക രേഖപ്പെടുത്തി. വന്ദേമാതരവുമായി ബന്ധപ്പെട്ട് കാലങ്ങളായി ഇന്ത്യയുടെ മതേതര സമൂഹം സ്വീകരിച്ചിരുന്ന സമീപനം തിരിച്ചുകൊണ്ടുവരണമെന്നും ആവശ്യപ്പെട്ടു.
