പാലക്കാട് ജോലി വാഗ്ദാനം ചെയ്ത് പീഡിപ്പിച്ചെന്ന പരാതിയിൽ പഞ്ചായത്ത് അംഗത്തെ സിപിഐഎമ്മിൽ നിന്നും ഡിവൈഎഫ്ഐയിൽ നിന്നും സസ്പെൻഡ് ചെയ്തു. സിപിഐഎം ശ്രീകൃഷ്ണപുരം ലോക്കൽ കമ്മിറ്റി അംഗവും വാർഡ് മെമ്പറുമായ സി സുജിത്തിനെയാണ് അന്വേഷണ വിധേയമായി സസ്പെൻഡ് ചെയ്തത്. 23കാരിയുടെ പരാതിയെ തുടർന്ന് സുജിത്തിനെതിരെ പൊലീസ് കേസെടുത്തതോടെയാണ് നടപടി.
ജോലി വാഗ്ദാനം ചെയ്ത് പരിചയപ്പെട്ട ശേഷം, വീട്ടിലെത്തിച്ച് പീഡിപ്പിച്ചെന്നായിരുന്നു ശ്രീകൃഷ്ണപുരം ലോക്കൽ കമ്മിറ്റി അംഗം സി സുജിത്തിനെതിരെ യുവതി നൽകിയ പരാതി. യുവതിയുടെ പരാതിയിൽ കഴിഞ്ഞ ദിവസം ശ്രീകൃഷ്ണപുരം പൊലീസ് കേസെടുത്ത് അന്വേഷണം ആരംഭിച്ചു. എന്നാൽ പരാതിക്ക് പിന്നാലെ ഒളിവിൽ പോയ സുജിത്തിനെ ബന്ധപ്പെടാനോ വിവരങ്ങൾ തേടാനോ സാധിച്ചില്ല. ഇതിന് പിന്നാലെയാണ് സുജിത്തിനെ അന്വേഷണ വിധേയമായി പാർട്ടി സസ്പെൻഡ് ചെയ്തതെന്ന് പഞ്ചായത്ത് പ്രസിഡന്റ് പി അരവിന്ദാക്ഷൻ പറഞ്ഞു. ഡിവൈഎഫ്ഐയിൽ നിന്നും സുജിത്തിനെ സസ്പെന്റ് ചെയ്തിട്ടുണ്ട്.
അതേസമയം ശ്രീകൃഷ്ണപുരം ഗ്രാമപഞ്ചായത്ത് വാർഡ് മെമ്പർ കൂടിയായ സുജിത്തിന്റെ രാജി ആവശ്യവും ഉയരുന്നുണ്ട്. പഞ്ചായത്തിൽ വിളിച്ചുചേർത്ത ബോർഡ് മീറ്റിംഗിൽ പ്രതിപക്ഷ വാർഡ് മെമ്പർമാർ കറുത്ത തുണി കൊണ്ട് വായ് മൂടിക്കെട്ടി പ്രതിഷേധിച്ചു. ഒളിവിലുള്ള സുജിത്തിനായി ശ്രീകൃഷ്ണപുരം പൊലീസ് അന്വേഷണം ഊർജിതമാക്കിയിട്ടുണ്ട്.
