കരിപ്പൂർ പോലീസ് സ്റ്റേഷനിൽ സൂക്ഷിച്ചിരുന്ന സ്വർണം കാണാതായ സംഭവത്തിൽ സ്വർണം മോഷ്ടിച്ചത് മുൻ എസ് എച്ച് ഒ എന്ന് കൊണ്ടോട്ടി എഎസ് പി യുടെ റിപ്പോർട്ട്. നിലവിൽ സസ്പെൻഷനിലുള്ള മുൻ സ്റ്റേഷൻ ഹൗസ് ഓഫീസറാണ് സ്വർണം മോഷ്ടിച്ചത്.2018 മുതൽ പല തവണകളായി നാട്ടുകാർക്ക് കളഞ്ഞു കിട്ടിയ എട്ട് പവനിൽ അധികം സ്വർണമാണ് സ്റ്റേഷനിൽ നിന്ന് മോഷണം പോയത്. ഇതുമായി ബന്ധപെട്ട് കൊണ്ടോട്ടി എഎസ് പി മലപ്പുറം ജില്ല പോലീസ് മേധാവിക്ക് നൽകിയ റിപ്പോർട്ടിലെ വിവരങ്ങളാണ് പുറത്ത് വന്നത്.
എന്നാൽ സംഭവം പുറത്തായതോടെ സ്വർണംതിരികെ വെക്കാൻ എസ് എച്ച് ഒ ശ്രമിച്ചെങ്കിലും നടന്നില്ല. സ്വർണം അബദ്ധത്തിൽ എടുത്തതെന്നാണ് എസ് എച്ച് ഒ നൽകിയ വിശദീകരണം.ലഹരി സംഘവുമായുള്ള ബന്ധത്തിന്റെ പേരിൽ നിലവിൽ സസ്പെൻഷനിലാണ് ആരോപണ വിധേയനായ ഉദ്യോഗസ്ഥൻ. കരിപ്പൂർ പോലീസ് സ്റ്റേഷനുമായി ബന്ധപെട്ട് ഉയർന്നുവരുന്ന ആരോപണങ്ങളിൽ എസ്ഐടി രൂപീകരിച്ച് സമഗ്ര അന്വേഷണം നടത്തണമെന്നാവശ്യപെട്ട് യൂത്ത് ലീഗ് സ്റ്റേഷനിലേക്ക് മാർച്ച് നടത്തി.
