വേതന വർധന ആവശ്യപ്പെട്ട് തൃശ്ശൂർ ജൂബിലി മിഷൻ ആശുപത്രിയിൽ സമരം നടത്തുന്ന നഴ്സുമാർക്ക് പൊലീസ് നോട്ടീസ് നൽകി. അത്യാഹിത വിഭാഗത്തിന്റെ ഗേറ്റ് ഉപരോധിച്ചുള്ള സമരം ഉടൻ അവസാനിപ്പിക്കണമെന്നാണ് നിർദേശം. മൂന്ന് വർഷമായി ശമ്പള വർധന നടപ്പാക്കിയിട്ടില്ലെന്നാരോപിച്ചാണ് ജൂബിലി മിഷൻ ആശുപത്രിയിലെ നഴ്സുമാർ സമരം നടത്തുന്നത്. നാല് മാസം പിന്നിട്ടിട്ടും പ്രശ്നത്തിന് പരിഹാരമാകാത്തതിനെ തുടർന്നാണ് അത്യാഹിത വിഭാഗത്തിന്റെ പ്രവേശന കവാടം ഉപരോധിച്ച് പ്രതിഷേധം ശക്തമാക്കിയത്. ഉപരോധ സമരം മൂന്നാം ദിവസത്തിലേക്ക് കടന്നതോടെയാണ് പൊലീസ് ഇടപെട്ടത്.
സമരം അവസാനിപ്പിച്ചില്ലെങ്കിൽ നിയമനടപടികൾ സ്വീകരിക്കുമെന്ന് പൊലീസ് നോട്ടീസിൽ മുന്നറിയിപ്പ് നൽകിയിട്ടുണ്ട്. ആശുപത്രി പരിസരത്ത് വൻ പൊലീസ് സന്നാഹവും വിന്യസിച്ചിട്ടുണ്ട്.അതേസമയം, കൊച്ചിയിൽ തൊഴിൽവകുപ്പ് വിളിച്ചുചേർത്ത ചർച്ചയിൽ ഇരുവിഭാഗങ്ങളുമായും രണ്ട് റൗണ്ട് ചർച്ചകൾ പൂർത്തിയായെങ്കിലും ഇതുവരെ സമവായത്തിലെത്തിയിട്ടില്ല. ചർച്ച പരാജയപ്പെട്ടാൽ സമരക്കാരെ ബലംപ്രയോഗിച്ച് അറസ്റ്റ് ചെയ്ത് നീക്കാനാണ് പൊലീസിന്റെ തീരുമാനം.
