അഞ്ചരക്കണ്ടി ദന്തൽ കോളേജിലെ ബിഡിഎസ് വിദ്യാർത്ഥി നിതിൻ രാജിന്റെ ആത്മഹത്യാ കേസിൽ ഒളിവിൽ കഴിയുന്ന ഡോ. എം.കെ. റാമിനെ കണ്ടെത്താനുള്ള ക്രൈം ബ്രാഞ്ച് അന്വേഷണം തുടരുന്നു. ആന്ധ്രാപ്രദേശിലെ ചിറ്റൂരിലോ ബംഗളൂരുവിലോ പ്രതി ഒളിവിൽ കഴിയുന്നുണ്ടെന്നാണ് അന്വേഷണസംഘത്തിന്റെ നിഗമനം. എന്നാൽ രണ്ടിടങ്ങളിലും നടത്തിയ പരിശോധനയിൽ പ്രതിയെ കണ്ടെത്താനായിട്ടില്ല.
ഡോ. റാമിന് ഒളിവിൽ കഴിയാൻ പ്രാദേശിക സഹായം ലഭിക്കുന്നുണ്ടെന്നാണ് അന്വേഷണസംഘത്തിന്റെ വിലയിരുത്തൽ. പ്രതി മൊബൈൽ ഫോൺ ഉപയോഗിക്കാത്തതും അന്വേഷണത്തിന് വെല്ലുവിളിയായിട്ടുണ്ട്.അതേസമയം, സുപ്രീം കോടതിയും ഹൈക്കോടതിയും മുൻകൂർ ജാമ്യാപേക്ഷ തള്ളിയിട്ടും പ്രതിയെ അറസ്റ്റ് ചെയ്യാൻ കഴിയാത്തതിൽ ഹൈക്കോടതി പൊലീസിനെ രൂക്ഷമായി വിമർശിച്ചിരുന്നു. ഇതിന്റെ പശ്ചാത്തലത്തിൽ ഡോ. എം.കെ. റാമിനെ കണ്ടെത്താനുള്ള തിരച്ചിൽ ക്രൈം ബ്രാഞ്ച് കൂടുതൽ ഊർജിതമാക്കിയിരിക്കുകയാണ്.
